ශ්‍රී ලාංකිකයින් සිංහල හා දෙමළ අලුත් අවුරුද්ද මහත් හරසරින් පිළිගනී – ඔබ සැමට සුබ අලුත් අවුරුද්දක් වේවා !

සිංහල හා දෙමළ වැසියන් සමරනු ලබන අලුත් අවුරුද්ද අද (14) පූර්වභාග 03.21ට යෙදී තිබූ සුබ මොහොතින් උදා වුණා.

මෙවර අලුත් අවුරුද්ද මහත් හරසරින් පිළිගන්නට සිංහල හා දෙමළ වැසියන් කටයුතු කළා.

අලුත් අවුරුද්ද උදාවීමෙන් පසු යෙදී දී තිබුණේ ලිපගිනි මෙලවීමේ සහ ආහාර පිසීමේ නැකතයි.

මෙම නැකත පූර්වභාග 04.04ට ඉටුකරන්නට මෙවර අලුත් අවුරුද්ද සමරන සිංහල හා දෙමළ වැසියන් කටයුතු කළා.

තඹ වර්ණ වස්ත්‍රාභරණයෙන් සැරසී දකුණු දිශාව බලා ලිප් බැඳ, ගිනි මොළවා කිරිබතක් හා කැවිලි වර්ගයක්ද දීකිරි සහ විලඳ ද පිළියෙල කරගැනීම යහපත් බවයි මෙවර නැකැත් සීට්ටුවේ සඳහන්ව තිබුණේ.

මෙවර අවුරුදු චාරිත්‍රවල වැඩ ඇල්ලීම ගනුදෙනු කිරීම හා ආහාර අනුභවය නැකත පූර්වභාග 06.44ට දී තිබූ සුබ මොහොතින් ඉටුකරන්නට අලුත් අවුරුද්ද සමරන ශ්‍රී ලාංකිකයින් කටයුතු කළා.

මුතු හා ශ්වේත වර්ණ වස්ත්‍රාභරණයෙන් සැරසී දකුණු දිශාව බලා වැඩ අල්ලා ගනුදෙනු කර ආහාර අනුභවය කළ යුතු බවයි 2025 අලුත් අවුරුදු නැකැත් සීට්ටුවේ දැක් වුණේ.

ඔබගේ සිතෙහි ඇති සුවහසක් බලාපොරොත්තු ඉෂ්ට කර ගැනීමට ශක්තිය ලැබෙන වසනාවන්ත අලුත් අවුරුද්දක් වේවායි යන්න “දසත නිවුස්” සුබ පැතුමයි.!