නැගෙනහිර හේවාගම කෝරළ විවිධ සේවා සමුපකාර සමිතියට අයත් රුපියල් කෝටි 50කට ආසන්න මුදලක් සාවද්‍ය පරිහරණය කිරීමේ සිද්ධියේ විත්තිකරුවකු වශයෙන් නම් කර සිටින චානුක රත්වත්තේ මහතා විදේශගත වීමට අවසර දෙන ලෙස කළ ඉල්ලීමක් කොළඹ මහාධිකරණ විනිසුරු නවරත්න මාරසිංහ මහතා ප්‍රතික්ෂේප කර තිබෙනවා.
දසත අධිකරණ වාර්තාකරු පැවසුවේ ශ්‍රී ලංකා මහ බැංකුවේ ලියාපදිංචි ප්‍රාථමික ගැනුම්කරුවකු වශයෙන් පෙනී සිට භාණ්ඩාගාර බිල්පත්වල ආයෝජනය කරන බව පවසා චානුක රත්වත්තේ විසින් අදාළ මුදල් සාවද්‍ය පරිහරණය කළ බවට පසුගියදා චෝදනා ගොනු වී තිබෙන බවයි.
සිය නීතීඥවරු මාර්ගයෙන් අද (10) මෝසමක් ඉදිරිපත් කරමින් චානුක රත්වත්තේ මහතා අධිකරණයට දන්වා සිටියේ මැයි මස 08 වනදා ඩුබායි හි දී පැවැත්වීමට නියමිත ව්‍යාපාරික හමුවකට සහභාගි වීමට තමන්ට අවශ්‍යව ඇති බැවින් ඒ සඳහා අධිකරණය මගින් දැනට පනවා තිබෙන විදේශ ගමන් තහනම තාවකාලිකව ඉවත් කරන ලෙසයි.
එහිදී විත්තිකරු විදේශගත වීම සඳහා ඉදිරිපත් කරන කරුණුවල පරස්පරතාවයන් දක්නට තිබෙන බව පෙන්වා දුන් රජයේ නීතිඥවරිය ඔහු විදේශගත වන දිනය ඊට අදාළව දක්වා ඇති තොරතුරු පිළිබඳව සෑහීමකට පත්විය නොහැකි බව පැවසුවා.
ඒ අනුව විත්තිකරුට පනවා තිබෙන විදේශ ගමන් තහනම ලිහිල් කිරීම සම්බන්ධයෙන් විරුද්ධ වන බවත් රජයේ නීතිඥවරිය මෙහිදි පැවසුවා.
ඉදිරිපත් වූ කරුණු සලකා බැලූ කොළඹ මහාධිකරණ විනිසුරු නවරත්න මාරසිංහ මහතා විත්තිකරුගේ විදේශ ගමන් තහනම ලිහිල් කරන ලෙස කරනු ලැබූ ඉල්ලීම ප්‍රතික්ෂේප කළා.
