විශ්වවිද්‍යාල අනධ්‍යයන කාර්යය මණ්ඩලය අද (12) පෙරවරුවේ සිට ක්‍රියාත්මක වන පරිදි සිය වැඩ වර්ජනය අත්හිටුවා තිබෙනවා.
මාස දෙකකට ආසන්න කාලයක් විශ්වවිද්‍යාල අධ්‍යයන කටයුතු අඩාල කරමින් මෙම වැඩ වර්ජනය ක්‍රියාත්මක වූ අතර විශ්වවිද්‍යාල ප්‍රතිපාදන කොමිෂන් සභාවේ සභාපතිවරයා සමග පැවති විශේෂ සාකච්ඡාවෙන් අනතුරුව විධායක ශ්‍රේණියේ අනධ්‍යයන කාර්යය මණ්ඩලය නිවේදනය කර ඇත්තේ ඔවුන් වැඩ වර්ජනය නතර කර දමන බවයි.
මෙම වැඩ වර්ජනය ක්‍රියාත්මක වූයේ වැටුප් විෂමතා ගැටලු කිහිපයක් මුල් කරගනිමින්.
මැයි මාසයේ මුල සතියේ සිට මෙම වැඩ වර්ජනය ක්‍රියාත්මක වූ අතර මේ හේතුවෙන් දිවයිනේ රාජ්‍ය විශ්වවිද්‍යාල පද්ධතියේ ඉගැන්වීම් ක්‍රියාවලිය මෙන් ම ඉගැනුම් ක්‍රියාවලිය ද බිඳ වැටුණා.
මෙවන් තත්ත්වයක් මතයි අධ්‍යාපන අමාත්‍ය ආචාර්‍ය සුසිල් ප්‍රේම්ජයන්ත් විසින් මැයි 08 වැනි දා විශ්වවිද්‍යාල අනධ්‍යයන කාර්ය මණ්ඩලවල වැටුප් විෂමතාව ඉවත් කිරීම සඳහා වන අමාත්‍ය මණ්ඩල සංදේශයක් කැබිනට් අනුකමිටුවට ඉදිරිපත් කළේ.
විශ්වවිද්‍යාල අනධ්‍යයන හා අධ්‍යයන කාර්ය මණ්ඩලවලට 2016 වසරේ දී වැටුප් වැඩිවීමක් දුන් බවත් එතැන දී අනධ්‍යයන කාර්ය මණ්ඩලය සඳහා සියයට 92කින් වැටුප් ඉහළ නැංවූ අතර අධ්‍යයන කාර්ය මණ්ඩලයට සියයට 107කින් වැටුප් වැඩි කිරීමක් සිදු වූ බවත් අධ්‍යාපන අමාත්‍යවරයා එදින පාර්ලිමේන්තුවේ දී කියා සිටියා.
මෙවන් තත්ත්වයක් මතයි විශ්වවිද්‍යාල ප්‍රතිපාදන කොමිෂන් සභාවේ සභාපතිවරයා සමග ඊයේ (11) පැවති සාකච්ඡාවකින් අන් අනතුරුව විධායක ශ්‍රේණියේ අනධ්‍යයන කාර්යය මණ්ඩලය සිය වර්ජනය අතහැර දැමීමට තීරණය කර ඇත්තේ.
