“ෂකීබ් කළ දේ හරි, මම එතන සිටියා නම් සිදුකරන්නේ ඒ දේම තමයි”

බංග්ලාදේශ නායක ෂකීබ් අල් හසන් කළ දේ නීතියට අනුකූල බවත්, තමන් එතන සිටියා නම් ඒ දේම සිදුකරන බවත් පාකිස්ථානයේ හිටපු නායක සහ කඩුලු රකින ක්‍රීඩක මොයින් ඛාන් පවසනවා.

ලෝක කුසලාන තරගාවලියේ ඊයේ (06) පැවති තරගයේ දී ඇන්ජලෝ මැතිව්ස්ගේ දැවීයාම සම්බන්ධයෙන් අදහස් දක්වමින් මොයින් ඛාන් මේ බව සඳහන් කළා.

ඇන්ජලෝ මැතිව්ස්ගේ දැවී යාම සම්බන්ධයෙන් හිටපු පාකිස්ථාන නායක මොයින් ඛාන්, ෂකීබ් අල් හසන්ගේ තීරණයට මෙලෙස සහාය පළ කර සිටියේ පකිස්ථාන ක්‍රීඩා නාලිකාවක් සමඟ පැවති සාකච්ඡාවකට එක්වෙමින්.

එහිදී වැඩිදුරටත් අදහස් දැක්වූ මොයින් ඛාන් මෙලෙස සඳහන් කළා,

“පිටියේදී එවැනි තීරණ ගන්නවා. නීතියට අනුව ෂකීබ් ඔහුගේ අයිතිවාසිකම් තුළ සිටියා. ෂකීබ් පැවසුවේ තම කණ්ඩායම ජයග්‍රහණය කිරීමට අවශ්‍ය නිසා තමා මෙම තීරණය ගත් බව එය නිවැරදි තීරණයක් ලෙසයි මම සිතන්නේ.”

කෙසේ වෙතත්, හිටපු පාකිස්තාන නායක මිස්බා-උල්-හක් මොයින් සමඟ මෙහි දී එකඟ නොවූ අතර, බංගලාදේශයේ ක්‍රීඩාවේ ආත්මය පිළිබඳව ඔහු ප්‍රශ්න කර සිටියා.

“සාමාන්‍ය බුද්ධිය කොහෙද? මම කවදාවත් මුලින්ම ආයාචනා කරන්නේ නැහැ. මෙය ක්‍රීඩාවේ සැබෑ ආත්මයට පටහැනියි. මැතිව්ස් හිතාමතාම ක්‍රියා පටිපාටිය ප්‍රමාද කළා නම් මට තේරෙනවා. ඔබේ ඕවර් රේට්එක මන්දගාමී වෙනවා, තරගයේ ප්‍රතිඵලයට බලපෑමක් හෝ යම් දඩයක් ලැබෙනවා. කිසිම දෙයක් තිබුණේ නැහැ. එය තත්පර 10-15 ක කාරණයක්, දැන් එක කමක් නෑ.ක්‍රිකට් ක්‍රීඩාවේ ආත්මය කොහෙද?” මිස්බා මෙහිදී සඳහන් කළා.

ඊයේ තරගයේ දී පන්දුවට පහරදීමට පිටිය ආ මැතිව්ස් ඔහුගේ හස් ආවරණයේ ඇති වූ යම් ප්‍රශ්නයක් හේතුවෙන් නව හිස්වැස්මක් රැගෙන එම සඳහා සංඥා කළා.

එම අවස්ථාවේ ෂකීබ් සහ බංග්ලාදේශ කණ්ඩායම ‘කාලය ඉක්මවා’ දැවී යාමක් සඳහා පැමිණිලි කළ අතර විනිසුරුවන් මැතිව්ස්ගේ බලාපොරොත්තු සුන් කරමින් එම අභියාචනය අනුමත කරනු ලැබුවා.