ශ්‍රී ලංකාවට ලබන වසරේ පැවැත්වෙන ලෝක ටෙස්ට් ශූරතා තරගාවලියේ අවසන් මහා සටන වෙනුවෙන් රැඳී සිටීම සඳහා තවත් ශක්තිමත් අඩිතාලමක් ලබා ගැනීමට හෙට (26) පැවැත්වෙන නවසීලන්තයට එරෙහි දෙවැනි ටෙස්ට් තරගයේ ජයග්‍රහණය අතිශයින් වැදගත් වන බව ක්‍රීඩා මාධ්‍ය වාර්තා කරනවා.
ශ්‍රී ලංකා කණ්ඩායම නවසීලන්තයට එරෙහිව පළමු ටෙස්ට් තරගය පසුගිය දා (23) ජයග්‍රහණය කළේ ලකුණු 63කින්.
එබැවින් ශ්‍රී ලංකා කණ්ඩායම මේ වනවිට ලෝක ටෙස්ට් ශූරතා ප්‍රසාද ලකුණු සටහනේ තුන්වැනි ස්ථානය දක්වා ස්ථාන දෙකකින් ඉදිරියට ඒමට සමත් ව සිටිනවා.
ශ්‍රී ලංකා කණ්ඩායම ටෙස්ට් තරග 08කට ක්‍රීඩා කර ඇති අතර ඉන් තරග 04ක් දිනා 04ක් පරාද වී තිබෙනවා.
මෙහි දෙවැනි තැන ඔස්ට්‍රෙලියාවටත් පළමු තැන ප්‍රබල ඉන්දියාවටත් හිමි ව ඇති බවයි දක්නට ලැබෙන්නේ.
ක්‍රීඩා විශ්ලේෂකයින් පවසන්නේ නවසීලන්තයට එරෙහිව පැවති පළමු තරගයේ දී ශ්‍රී ලංකා කණ්ඩායමේ ලැබූ ජයග්‍රහණයේ බොහෝ ධනාත්මක කරුණු තිබූ බවත් තවත් ඉදිරියට යාමට නම් නවසීලන්ත ආධිපත්‍යය හෙට දිනයේ දී සම්පූර්ණයෙන් ම බිඳ දැමිය යුතු බවයි.
