ගලේවෙල ප්රදේශයේ වෙළෙඳසැලක බලපත්රයක් අලුත් කරදීම සඳහා එහි හිමිකරුගෙන් රුපියල් ලක්ෂ දෙකක අල්ලස් මුදලක් ලබාගත් බව කියන මහජන සෞඛ්ය පරීක්ෂකවරයකු මාර්තු මස 03 දින දක්වා රක්ෂිත බන්ධනාගාරගත කරන ලෙස කොළඹ ප්රධාන මහෙස්ත්රාත් තනූජා ලක්මාලි මහත්මිය අද (17) නියෝග කළා.
ගලේවෙල ප්රදේශයේ මහජන සෞඛ්ය පරීක්ෂකවරයෙක් වන ඉසුරු බණ්ඩාර නමැත්තෙක් එසේ රක්ෂිත බන්ධනාගාරගත කිරීමට නියම වූ බවයි දසත අධිකරණ වාර්තාකරු පැවසුවේ.
ගලේවෙල වෙළෙඳසැල් හිමිකරුවෙකු වන ගෝවින්ද ධර්මරත්න නමැති අයකු අල්ලස් හෝ දූෂණ විමර්ශන කොමිසමට කරන ලද පැමිණිල්ලක් අනුව සැකකාර මහජන සෞඛ්ය පරීක්ෂකවරයා ඉකුත් 14 දින අත්අඩංගුවට ගෙන තිබුණා.
අත්අඩංගුවට ගත් සැකකාර මහජන සෞඛ්ය පරීක්ෂකවරයා ඉකුත් 15 වැනි දින දඹුල්ල මහේස්ත්රාත් අධිකරණයට ඉදිරිපත් කිරීමෙන් අනතුරුව අද දින දක්වා රක්ෂිත බන්ධනාගාර ගත කර තිබුණා.
එසේ රක්ෂිත බන්ධනාගාරගත කර සිටි සැකකාර පුද්ගලයා බන්ධනාගාර නිලධාරීන් විසින් අද කොළඹ ප්රධාන මහෙස්ත්රාත් අධිකරණයට ඉදිරිපත් කළ අතර එහිදී අල්ලස් හෝ දූෂණ විමර්ශන කොමිසම වෙනුවෙන් පෙනී සිටි විමර්ශන නිලධාරීහු අධිකරණයට දැක්වූ කරුණු සලකා බලමින් සැකකරු මාර්තු මස 03 දින දක්වා තවදුරටත් රක්ෂිත බන්ධනාගාරගත කරන ලෙස මහෙස්ත්රාත්වරිය නියෝග කළා.
එම වෙළෙඳසැලට අදාළ 2025 වර්ෂය සඳහා වූ බලපත්රය අලුත් කර දෙන ලෙසට පැමිණිලිකාර පුද්ගලයා සැකකාර මහජන සෞඛ්ය පරීක්ෂකවරයාගෙන් ඉල්ලා ඇති බවත් එම ඉල්ලීම කඩිනමින් ඉටු කරදීම සඳහා ඔහු පැමිණිලිකරුගෙන් රුපියල් ලක්ෂ දෙකක මුදලක් අල්ලස් වශයෙන් ඉල්ලා ඇති බව ද විමර්ශන නිලධාරීහු අධිකරණයට දැක්වූ කරුණුවලින් හෙළි වුණා.
පසුව පැමිණිලිකරු සිද්ධිය සම්බන්ධයෙන් අල්ලස් හෝ දූෂණ විමර්ශන කොමිසමට කළ දැනුම්දීමක් අනුව උපාය දූතයන් යොදවා සැකකරු අත්අඩංගුවට ගත් බව ද විමර්ශන නිලධාරීහු සිද්ධිය සම්බන්ධයෙන් වැඩිදුරටත් කරුණු දක්වමින් අධිකරණය හමුවේ පැවසුවා.
