සිය ප්‍රේමවන්තයාගේ ලිංගේන්ද්‍රය කපා දැමූ වෛද්‍යවරියක් සම්බන්ධ පුවතක් අසල්වැසි ඉන්දියාවේ බිහාර් ප්‍රාන්තයෙන් වාර්තා වනවා.
මොවුන් දෙදෙනා අතර වසර දෙකක පමණ කාලයක් පැවති ප්‍රේම සම්බන්ධයකින් පසු පෙම්වතා විසින් විවාහවීම ප්‍රතික්ෂේප කර ඇති බවයි වාර්තා වන්නේ.
වෛද්‍යවරිය විසින් විවාහවීමට පෙම්වතාට කළ යෝජනාව ප්‍රතික්ෂේප කිරීමෙන් පසු ඇති වූ බහින්බස් වීමක් දුරදිග යාමෙන් පසුව ඇය මෙලෙස එම පුද්ගලයාගේ ලිංගේන්ද්‍රය කපා දමා තිබෙනවා.
සිද්ධියට සම්බන්ධ සැකකාර වෛද්‍යවරිය අත්අඩංගුවට ගෙන ඇති අතර, ඇය සන්තකයේ තිබී ලේ තැවරුණු පිහියක් ද සොයාගැනීමට පොලිස් නිලධාරීන්ට හැකිව ඇති බවයි ඉන්දීය මාධ්‍ය වාර්තා කළේ.
ඊයේ (01) සිදු වූ මෙම සිද්ධියෙන් තුවාල ලැබූ පුද්ගලයා කඩිනමින් රෝහල් ගත කර ඇති අතර ඔහු මේ වනවිට ප්‍රතිකාර ලබමින් සිටිනවා.
26 හැවිරිදි මෙම වෛද්‍යවරිය 30 හැවිරිදි තරුණයා සමඟ සබඳතාව පැවැත් වූ කාලය තුළ විවාහ කරගන්නා මුවාවෙන් තමාව ලිංගික අපයෝජනයට ලක් කළ බවට ඇය චෝදනා කර සිටිනවා.
පෙම්වතා විසින් විවාහවීම ප්‍රතික්ෂේප කිරීමත් සමඟ තමන් දැඩි ලෙස මානසික වේදනාවෙන් පෙළුණු බැවින් ඔහුව තම සායනයට කැඳවා පහර දුන් බවත් එම වෛද්‍යවරිය පවසා තිබෙනවා.
පසුව ඔහුට ඖෂධයක් එන්නත් කර ඔහුගේ ලිංගේන්ද්‍රිය කපා දැමීමට කටයුතු කළ බව ඇය පොලිසිය හමුවේ පවසා ඇති බව සඳහන්.
එමෙන්ම සිය පෙම්වතාගේ පෙරැත්තය මත තමන් ගබ්සා කිරීම් දෙකක් ද සිදුකළ බවයි ඇය වැඩිදුරටත් පොලිසිය හමුවේ පවසා ඇත්තේ.
