චීනයේ ෆූජියෑං පළාතෙහි සුප්රසිද්ධ සටන් කලා ගුරුවරයෙක් වන මාස්ටර් “ය – ෂාඔරොං” (Li, Shaorong) ශ්රී ලංකාවට පැමිණ තිබෙනවා.
අප ගුවන්තොටුපොළ වාර්තාකරු සඳහන් කළේ අද (04) රාත්රී 07,15ට පමණ ඔහු කටුනායක ගුවන්තොටුපළින් මෙරටට පැමිණි බවයි.
චීනයේ ජනප්රිය එමෙන්ම සාම්ප්රදායික චීන සංස්කෘතිය හා බැදුණු සටන් කලාවක් වන වින්ග් -චුං (Wing Chun) ශෛලිය නිර්මාණය කරන ලද පරම්පරාවෙහි 09 වන පරම්පරාවෙහි නායකතුමා වන්නේ මාස්ටර් ‘ය – ෂාඔරොං’ වනවා.
ලෝක ප්රකට සටන් ශිල්පියෙකු හා නලුවෙකු වන බෲස්-ලි පළමුවෙන් ම අභ්යාසය ලබා ඇත්තේ ද මෙම වින්ග් -චුං සටන් කලාවයි.
ශාරීරික මෙන් ම මානසිකව ද පුද්ගලයාට ප්රතිලාභ රැසක් ලබාදෙන ඉහළ පෙළේ සටන් ශෛලියක් ලෙසෙ මෙම චිං-චුං සටන් ශෛලිය හඳුනාගෙන තිබෙනවා.
ය – ෂාඔරොං ශ්රී ලංකාවට පැමිණෙන්නේ චීන ජනතාව සතු මෙම වින්ග් -චුං සටන් කලාව ශ්රී ලංකාවට දායාද කිරීමේ චේතනාව සාර්ථක කර ගැනීම සඳහායි.
ඔහු ගෙන්වීම සහ මෙම අවස්ථාව ශ්රී ලංකාව තුළ සංවිධානය කරනූයේ ශ්රී ලංකා වූෂු සම්මේලනය සහ චීන තානාපති කාර්යාලයට අනුබද්ධ චීන සංස්කෘතික මධ්යස්ථානය විසින්.
හෙට (05) දින මෙම වින්ග් -චුං සටන් කලාව සම්බන්ධයෙන් එහි වටිනාකම සහ සංස්කෘතික සටන් කලා සංදර්ශනයක් කොළඹ BMICH පරිශ්රය තුළ පස්වරු 02.30ට සංවිධානය කර තිබෙනවා. මේ සදහා සහභාගී වන අය හට විශේෂ සහතික පත්රයක් පිරිනැමීමට ද කටයුතු සූදානම් කර තිබෙන බවයි ශ්රී ලංකා වූෂු සම්මේලනයේ සභාපතිවරයා ප්රකාශ කළේ.
පසුව ජනවාරි 06 වනදා මාතර කොටවිලගම ක්රීඩා අමාත්යාංශ ගෘහස්ත ක්රීඩාංගනයේදී පෙරවරු 08.30 සිට පස්වරු 06.30 දක්වා මෙම සංස්කෘතික සටන් කලාව හඳුන්වා දීම සහ ඉගැන්වීම සිදුකිරීමට නියමිතයි.
කටුනායකට පැමිණි සටන් කලා උපදේශකවරයා පිළිගැනීම සඳහා ශ්රී ලංකා වූෂු සම්මේලනයේ සභාපති මානෙල් ධර්මකීර්ති මහතා සහ චීන සංස්කෘතික මධ්යස්ථානයෙහි නිලධාරීන් පැමිණ සිටියා.
