විදෙස් රටවල දේපල තියෙනවානම් හොයාගෙන නඩු දාන්න. මම ලෑස්තියි විගණනය කරන්න – නාමල් අභියෝග කරයි

තමන්ට හෝ තම පවුලට විදේශයක දේපල ඇත්නම් ඒවා සොයාගෙන ඒ ඒ රටවල නඩු දමන ලෙසත් එම නඩු සඳහා පෙනී සිටීමට තමන් සූදානම් බවත් හිටපු අමාත්‍ය නාමල් රාජපක්ෂ මහතා පැවැසීය.

අද (21දා) පාර්ලිමේන්තුවේදි ප්‍රකාශයක් කරමින් ඔහු මේ බව පැවැසිය.

“අපට චෝදනා බොහෝමයක් එල්ල කළා. 2015ට පෙර අපිට එල්ල වූ චෝදනා ගැන පරීක්ෂණ කළා. ඒ පරණ චෝදනා ගැන අපිට තවමත් එල්ල කරනවා.

බිට් කොයින් ගැන සාක්ෂි තියෙනවානම් අධිකරණයට යන්න. ඕනෑම පරික්ෂණයකට යන්න අපි සූදානම්. දැන් කියනවා පෝට් සිටි එක නාමල් රාජපක්ෂගේ බූදලයක් කියනවා. ඉස්සර කිව්වා කොමිස් ගැහුවා කියලා.

මේ බොරු චෝදනාවලට පාර්ලිමේන්තුව යටත් කරන්න එපා. අවුරුදු 5ක් ලෝකේ වටේ ඇවිද්දා, අධිකරණයේ නඩු දැම්මා. අධිකරනයෙන් නිදොස් කොට නිදහස් කළා.

අපිට, අපේ පවුලේ අයට ලෝකයේ කොහේ හරි දේපල තියෙනවානම්. ඒවා හොයන්න ඒ රටවල නඩු දාන්න අපි සූදානම් ඒවට මුහුණ දෙන්න.

පසුගිය අවුරුදු 12ම මම පාර්ලිමේන්තුවට මගේ වත්කම් බැරකම් දිලා තියෙනවා. මම සූදානම් විගණනය කරන්න. මම විගණනය කරලා ඒ වාර්තාවත් පාර්ලිමේන්තුවට ඉදිරිපත් කරනවා.”