තලවකැලේ, ලිඳුල, ලෝගී වත්තේ වතු කම්කරු නිවසක වහලයක් මතින් නිවස තුළට වැටුණු කඳුකර කොටියෙකු නිර්වින්දනය කර යළි කැලයට මුදාහැරි බව ලිඳුල පොලීසිය පවසනවා.
අද (05) අලුයම් කාලයේ දී මෙම කොටියා වහලය මතින් නිවස තුළට වැටී තිබෙනවා.
ඒ පිළිබඳව සොයා බැලීමට ගිය වතු කම්කරුවෙකුට ද නිවස තුළ කොටු වී සිටි කොටියා පහර දී ඇති බවයි වාර්තා වුණේ.
කොටියාගේ පහර කෑමට ලක් වූ පුද්ගලයා ලිඳුල ප්රාදේශීය රෝහලට ඇතුළත් කිරීමෙන් පසුව වැඩිදුර ප්රතිකාර සඳහා නුවරඑළිය මහ රෝහලට මාරුකර යවා තිබෙනවා.
පසුව රන්දෙණිගල වන සත්ත්ව පශු වෛද්ය රෝහලේ පශු වෛද්ය නිලධාරීන් සහ වනජීවී නිලධාරීන් පැමිණ නිවස තුළ කොටු වී සිටි කොටියා මුදා ගැනීමට පැමිණියා.
වනජීවී නිලධාරීන් එම ස්ථානයට පැමිණෙන තෙක් එම සත්වයා සිටි නිවසේ දොර ජනෙල් ලී දඬු යොදා ආරක්ෂිත වටපිටාවක් සැකසීමට ප්රදේශවාසීන් කටයුතු කර තිබුණා.
අනතුරුව පැය හතක පමණ අධික කාලයක් දැඩි පරිශ්රමයක් දරා කොටියා නිර්වින්දනය කර නිවසින් පිටතට ගැනීමෙන් පසු යළි රක්ෂිතයට මුදාහැර තිබෙනවා.
