වසර 32කට පෙර පොලු මුගුරුවලින් පහර දී පුද්ගලයකු ඝාතනය කිරීම සම්බන්ධයෙන් චෝදනා ලැබූ විත්තිකරුවන් තිදෙනෙකු වරදකරුවන් කරමින් කළුතර මහාධිකරණ විනිසුරු ප්‍රදීප් අබේරත්න මහතා විසින් අද
ඔවුන් හට මරණ දඬුවම නියම කර තිබෙනවා.
තවත් පුද්ගලයකුට වසර 10ක බරපතළ වැඩ සහිත ව සිරදඬුවම් නියම කර ඇති බවයි අප ප්‍රාදේශීය වාර්තාකරු පැවසුවේ.
මීගමවත්ත ජනපදය, 5 කණුවේ ප්‍රදේශයේ පදිංචිව සිටි ධනපාල ප්‍රනාන්දු නමැත්තා වර්ෂ 1992 ජනවාරි මස 15 හෝ ඊට ආසන්න දිනක නවුත්තුඩුව – කීරන්තිඩිය ප්‍රදේශයේ දී ඝාතනය කිරීම සම්බන්ධයෙනුයි සැකකරුවන්ට එරෙහි ව චෝදනා ගොනු කෙරුණේ.
3, 4 සහ 5 වන විත්තිකරුවන් වන වලගෙදර – පල්ලේගොඩ පදිංචි මල්මුතුගේ දයාරත්න නොහොත් ඔලිවර් , නවුත්තුඩුව – කීරන්තිඩිය ප්‍රදේශයේ පදිංචි අනගිපුර ආරියරත්න නොහොත් ලොක්කා, 5 කණුව – කිරිමැටිය ප්‍රදේශයේ පදිංචි ධර්මතිලක ප්‍රනාන්දු නොහොත් ප්‍රේමතිලක ප්‍රනාන්දු නමැති පුද්ගලයන් හට මෙසේ මරණ දඬුවම හිමිවුණා.
1 වන විත්තිකරු වන බේරුවල – කාලවිල ප්‍රදේශයේ පදිංචි අනගිපුර ප්‍රේමතිලක නොහොත් රත්නා යන අයට වසර 10 ක සිර දඬුවම් සහ රුපියල් ලක්ෂ තුනක වන්දියක් ද; එකී වන්දිය නොගෙවන්නේ නම් තවත් වසර දෙකක සිර දඩුවම් ද නියම කිරීමටයි විනිසුරුවරයා නියෝග කළේ.
එකී නඩුවේ 2 වන විත්තිකරු පිළිකා රෝගයකින් මියගොස් ඇති බවටත් අධිකරණයේ දී අනාවරණය වුණා.
නවුත්තුඩුව – කීරන්තිඩිය ප්‍රදේශයේ දී පොලුමුගුරුවලින් පහර දී මනුෂ්‍ය ඝාතනයක් සිදු කිරීම සම්බන්ධයෙන් විත්තිකරුවන් වැලිපැන්න පොලිසිය විසින් අත්අඩංගුවට ගෙන, මතුගම මහේස්ත්‍රාත් අධ්කරණයේ මූලික සාක්ෂි විභාග කිරීමෙන් පසු නීතිපතිවරයා විසින් මහාධිකරණය ඉදිරියේ අධිචෝදනා ගොනු කිරීමට කටයුතු කළා.
එච්. සී. 54/96 අංක යටතේයි නඩුව විභාගයට ගැනුණේ.
වසර 32කට ආසන්න දීර්ඝ නඩු විභාගයකින් පසු ව මෙම නඩු තීන්දුව ප්‍රකාශයට පත්කළ අතර, විත්තිකරුවන්ගේ පවුලේ ඥාතීන් පිරිසක් ද කළුතර අධිකරණ භූමිය ඉදිරිපිට රැස්ව සිටියා.
