මෙම වසරේ මේ දක්වා ගත වූ දින 41ක කාලය තුළ පුද්ගලයින් 24 දෙනෙකු ජල රකුසාට බිළි වී ඇති බව පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යු. වුට්ලර් පවසනවා.
පොලිස් මාධ්‍ය කොට්ඨාසයේ අද (11) පැවති මාධ්‍ය හමුවක දී මාධ්‍ය ප්‍රකාශකවරයා මේ බව සඳහන් කළා.
මෙහිදී අදහස් දක්වමින් මාධ්‍ය ප්‍රකාශකවරයා සඳහන් කළේ පසුගිය 2025 වසර තුළ දිය අනතුරුවලින් පුද්ගලයින් 376 දෙනෙකු ජීවිතක්ෂයට පත්ව ඇති බවයි.
එමෙන්ම 2024 වසරේ එම සංඛ්‍යාව 595ක් බවයි ඔහු වැඩිදුරටත් සඳහන් කර සිටියේ.
මේ අතර 2025 වසරේ දී දේශීය පුද්ගලයින් 151 දෙනෙකු සහ විදේශීය ජාතිකයින් 96 දෙනෙකු ගේ ජීවිත දිය අනතුරුවලින් බේරාගැනීමට පොලිස් ජීවිතාරක්ෂක කණ්ඩායම්වලට හැකියාව ලැබී ඇති බවයි මාධ්‍ය ප්‍රකාශකවරයා පැවසුවේ.
එමෙන්ම මෙම වසරේ මේ දක්වා කාලය තුළ දේශීය පුද්ගලයින් 17 දෙනෙකු සහ විදේශීය ජාතිකයින් 16 දෙනෙකුගේ ජීවිත ජල රකුසාට බිළිවන්නට නොදී බේරාගැනීමට පොලිස් ජීවිතාරක්ෂක කණ්ඩායම්වලට හැකියාව ලැබූ බවයි ඔහු සඳහන් කර සිටියේ.
