විස්සයි විස්ස ලෝක කුසලාන තරගාවලියේ අයර්ලන්තයට එරෙහිව ඊයේ (08) පැවති පළමු තරගයේ දී ශ්‍රී ලංකා දඟ පන්දු යවන ක්‍රීඩක වනිඳු හසරංග පාදයේ අබාධයකට ලක් වුණා.
ඔහුගේ වම් පාදයේ කලවා මාංශ පේශි ආබාධයකට ලක්ව ඇති අතර, ඔහුව අද MRI ස්කෑන් පරීක්ෂණයකට යොමුකට එහි ප්‍රතිඵල බලාපොරොත්තුවෙන් සිටින බවයි ක්‍රිකට් ආරංචි මාර්ග සඳහන් කළේ.
මේ අතර ලබන 12 වනදා පල්ලෙකැලේ ක්‍රීඩාංගණයේ දී ශ්‍රී ලංකාව මුහුණ දෙන මීළඟ තරගය සඳහා වනිඳු හසරංග කණ්ඩායම සමඟ නොයන බවයි ක්‍රිකට් ආරංචි මාර්ග වැඩිදුරටත් පවසන්නේ.
ඔහුට වෛද්‍ය අනුමැතිය සහ විශේෂඥයින්ගේ වැඩිදුර උපදෙස් බලාපොරොත්තුවෙන් සිටීම මීට හේතු වී තිබෙනවා.
මේ අතර දඟ පන්දු යවන තුන් ඉරියව් ක්‍රීඩක දුෂාන් හේමන්ත අතිරේක ක්‍රීඩකයෙකු ලෙස මහනුවරට යනු ඇති බවට තොරතුරු වාර්තා වනවා.
ආබාධයකට ලක්ව සිටින හසරංග වෙනුවට ආදේශ කිරීමට වෙනත් ක්‍රීඩකයෙකු තෝරා ගන්නේ නම් ICC තරඟාවලි රෙගුලාසි යටතේ, ICC තාක්ෂණික කමිටුව විසින් අදාළ අනුමැතිය දිය යුතු වනවා.
යම් හෙයකින් හසරංගට ඉවත්වීමට සිදුවූහොත් එය ශ්‍රී ලංකා කණ්ඩායමට දැඩි බලපෑමක් එල්ල වනු ඇති අතර, දුෂාන් හේමන්ත සහ පාදඟ පන්දු යවන ක්‍රීඩක ජෙෆ්රි වැන්ඩර්සේ යන දෙදෙනාගෙන් එක් අයෙකු ඔහු වෙනුවට තෝරා ගනු ඇතැයි අපේක්ෂා කෙරෙනවා.
