වනවාසල දුම්රිය ස්ථානයට ආසන්නයේ දී සිදුවූ දුම්රිය අනතුර සම්බන්ධයෙන් දැනුවත් කිරීම සඳහා අද (17) මාධ්‍ය සාකච්ඡාවක් කැඳවා තිබුණා.
මෙම මාධ්‍ය සාකච්ඡාවට සභාගී වූ බස්නාහිර පළාත උතුර නියෝජ්‍ය පොලිස්පති කාලිංග ජයසිංහ සඳහන් කළේ, දුම්රිය අනතුරට හේතු වූ දුම්රිය මාර්ගයේ කොටස් ගලවා විකිණූ පුද්ගලයා සහ එම කොටස් මිල දී ගත් පුද්ගලයා අත්අඩංගුවට ගත් බවයි.
දුම්රිය මාර්ගයේ කොටස් ගැලවූ පුද්ගලයා අධික ලෙස මත්ද්‍රව්‍යවලට ඇබ්බැහිව සිටින අයෙකු වන අතර, ඔහු වයස අවුරුදු 25ක අයෙක් බවයි නියෝජ්‍ය පොලිස්පතිවරයා පැවසුවේ.
දුම්රිය මාර්ගයේ, ගැලවූ කොටස් විකුණා ඇත්තේ රුපියල් 3,000ක මුදලකට බවයි ඔහු වැඩිදුරටත් සඳහන් කර සිටියේ.
මෙම කොටස් ගලවා විකිණීමෙන් ලැබෙන්නේ සුළු ලාභයක් වුවද මෙවැනි සිදුවීම් හරහා මිලියන ගණනක හානියක් සිදුව ඇති බවත් ඔහු මෙහිදී වැඩිදුරටත් අදහස් දක්වමින් පැවසුවා.
මේ අතර අත්අඩංගුවට ගැනුණු පුද්ගලයින් දෙදෙනා පොදු දේපලවලට හානි සිදුකිරීමට අමතරව මෙම අනතුරින් සිදු වූ හානිය හා අලාභ‍ය සම්බන්ධයෙන් නඩු පවරමින් අධිකරණය ඉදිරිපත් කිරීමට නියමිතයි.
එමෙන්ම මේ සම්බන්ධයෙන් විමර්ශන කටයුතු තවදුරටත් සිදුකරන බවයි නියෝජ්‍ය පොලිස්පතිවරයා පැවසුවේ.
