වනවාසල දුම්රිය ස්ථානය අසල ඊයේ (16) අලුයම දුම්රියක් පීලි පැන පෙරළීයාමෙන් අනතුරක් සිදු වුණා.
මෙම දුම්රිය අනතුරට ලක්වීමට පෙර අනතුර සිදුවූ ස්ථානයෙන් තවත් දුම්රිය දෙකක් ධාවනය වී ඇති බව ලංකා ලොකොමෝටිව් ඔපරේටින් ඉංජිනියර්ස් සංගමයේ සභාපති ජීවා ගුණවර්ධන පවසනවා.
එලෙස ධාවනය වූ ත්රිකුණාමලයේ සිට පැමිණි රාත්රී තැපැල් දුම්රියේ රියදුරුට, දුම්රිය අනතුර සිදුවූ ස්ථානයේ පාලන සංඥාවේ යම් දෝෂ තත්ත්වයක් නිරීක්ෂණය වී ඇති බවයි සභාපතිවරයා අද (17) මාධ්ය හමුවක් කැඳවමින් සඳහන් කළේ.
ඒ හේතුවෙන් එම දුම්රියේ රියදුරා විසින් දුම්රිය එම ස්ථානයේ නවතා ඒ සම්බන්ධයෙන් දුම්රිය පාලක මැදිරියට දැනුම්දීමට කටයුතු කර ඇති බවයි ඔහු වැඩිදුරටත් පැවසුවේ.
එම දැනුම්දීම මත දුම්රිය පාලක මැදිරියෙන් ලැබුණු උපදෙස් මත දුම්රිය ඉදිරියට ධාවනය කර ඇති බවයි සභාපතිවරයා සඳහන් කළේ.
ත්රිකුණාමලයේ සිට පැමිණි රාත්රී තැපැල් දුම්රිය එම ස්ථානයේ නවතා තිබීම හේතුවෙන් ඇති වූ ප්රමාදය මත, ඊට පසුපසින් පැමිණි කන්කසන්තුරේ රාත්රී තැපැල් දුම්රිය ද වනවාසල දුම්රිය ස්ථාන අසළ පාලන සංඥාවේ නතරකර ධාවනය කර ඇති බව ඔහු පවසනවා.
කෙසේ වෙතත් එම දුම්රිය දෙකට පසුව පැමිණි අංක 507 දරණ දුම්රිය මෙලෙස අනතුරට ලක්ව ඇති බවයි සභාපති මෙම මාධ්ය හමුවේ දී සඳහන් කර සිටියේ.
මේ අතර සභාපතිවරයා පවසා සිටියේ දුම්රිය දෙපාර්තමේන්තුවේ මාර්ග හා සංඥා අංශයෙන් යොදවා තිබූ රාත්රී මුර සංචාර මේ වනවිට ක්රියාත්මක නොවන බවයි.
ඒ, අනුව මෙවැනි දුම්රිය අනතුරු වළක්වා ගැනීම වෙනුවෙන් රාත්රී මුර සංචාර කටයුතු යළි ආරම්භ කරන ලෙස දුම්රිය දෙපාර්තමේන්තුවට දැනුම් දෙන බව ඔහු වැඩිදුරටත් සඳහන් කළා.
