සමගි ජන බලවේගය විසින් රජයේ සහ පළාත් සභා ක්ෂේත්‍ර ගණනාවක නියුක්ත රාජ්‍ය නිලධාරීන් සඳහා පිළිගත හැකි තර්කානුකූල නොවන පදනමකින් සේවා ස්ථාන මාරු කිරීමේ සැලසුම්සහගත වැඩපිළිවෙළක් සම්බන්ධයෙන් මාධ්‍යයට හෙළි කර තිබෙනවා.
නිවේදනයක් නිකුත් කරමින් අද (26) දිනයේ දී සමගි ජන බලවේගය පවසන්නේ පළාත් පාලන සහකාර කොමසාරිස්වරු, පළාත් පාලන ආයතන ලේකම්වරුන් මෙන් ම සමූපකාර සහකාර සංවර්ධන කොමසාරිස් වැසි මාණ්ඩලික මෙන් ම ක්ෂේත්‍ර නිලධාරීන්ට ද මෙය බලපෑ ඇති බවට තොරතුරු වාර්තා වන බවයි.
රාජ්‍ය සේවයේ ස්වාධීනත්වය තහවුරු කිරීමට කටයුතු කරනවා යැයි පොරොන්දුවක් ලබාදෙමින් බලයට පැමිණි ආණ්ඩුව මෙලෙස කටයුතු කිරීම ගැටලුසහගත බවයි සමගි ජන බලවේගය සඳහන් කරන්නේ.
තවමත් අවසන් නැති හා නුදුරේම පැවැත්වීමට නියමිත පළාත් පාලන මැතිවරණය හා මේ දිනවල පැවැත්වෙන සමූපකාර සංගම් ඡන්ද විමසීම් ද පැවැත්වෙන බවත් එහි සඳහන්.
පෙර නොවූ විරූ අයුරින් රාජ්‍ය සේවය තුළ ශීඝ්‍ර ලෙස දේශපාලනිකරණය වීමක් සිදු වෙමින් පවතින බව ද සමගි ජන බලවේගය පවසනවා.
ඉදිරි මැතිවරණ ඉලක්ක කරගනිමින් ආණ්ඩුව ක්‍රියාත්මක කරන බව පැහැදිලිව ම දක්නට ලැබෙන බවයි සමගි ජනබලවේගය මහලේකම් රංජිත් මද්දුමබණ්ඩාර මහතාගේ අත්සනින් යුතුව නිකුත් කළ නිවේදනයේ දැක්වෙන්නේ.
මේ හේතුවෙන් රජය සහ පළාත් සභා මට්ටමින් අත්තනෝමතික ව සිදුකරන සියලු ම මාරු කිරීම් අත් හිටුවන ලෙසට සමගි ජන බලවේගය විපක්ෂය වශයෙන් ආණ්ඩුවෙන් ඉල්ලා සිටිනවා.
