ව්යසනය හමුවේ බිඳ වැටුණු ජනතාවගේ ජීවනෝපායමාර්ග යළි ගොඩනඟා දීමට ප්රමුඛතාව ලබා දිය යුතු බවත්, හානි සඳහා වන්දි ගෙවීම් කඩිනම් කර කෘෂි, ධීවර සහ කර්මාන්ත ක්ෂේත්රය යළි පණ ගැන්වීමට කඩිනමින් පියවර ගන්නා ලෙසත් ජනාධිපති අනුර කුමාර දිසානායක නිලධාරීන්ට උපදෙස් දුන්නා.
ජනාධිපති අනුර කුමාර දිසානායක මෙම උපදෙස් ලබා දුන්නේ අද (13) පෙරවරුවේ පුත්තලම දිස්ත්රික් ලේකම් කාර්යාලයේ පැවති විශේෂ සම්බන්ධීකරණ කමිටු රැස්වීමට එක් වෙමින්.
වගා හානි සඳහා අදාළ වන්දි ගෙවීම් මෙම දෙසැම්බර් 25 වනදාට පෙර නිම කරන ලෙසද ජනාධිපතිවරයා උපදෙස් ලබා දුන්නා.
පසුගිය සුළි කුණාටුව රටටම එකවර මුහුණ දීමට සිදුවූ මෑතකාලීන විශාලතම ව්යසනය බව මෙහිදී පෙන්වා දුන් ජනාධිපතිවරයා ඒ හමුවේ බිද වැටුණු ජන ජීවිතය යථා තත්ත්වයට පත් කිරීම වෙනුවෙන් ත්රිවිධ හමුදාව, පොලිසීය සහ රාජ්ය නිලධාරින් සිදු කළ මහත් කැපවීම අගය කළ අතර, එම කැපවීම නිසාම විදුලිය ජලය සහ මාර්ග වැනි අත්යවශ්ය යටිතල පහසුකම්වලින් සැළකිය යුතු ප්රමාණයක් මේ වන විට ප්රතිසංස්කරණය කර ඇති බවද සඳහන් කළා.
එමෙන්ම ආපදාවට ලක් වූ ජනතාවට මෙතරම් ඉහළ වන්දි මුදලක් ලබා දීමට රජයට හැකි වූයේ රජය පවත්වාගෙන යන ශක්තිමත් මූල්ය විනය නිසා බවද ජනාධිපතිවරයා පෙන්වා දුන්නා.
රාජ්ය පරිපාලන, පළාත් සභා හා පළාත් පාලන අමාත්ය පුත්තලම දිස්ත්රික් සම්බන්ධීකරණ කමිටු සභාපති චන්දන අබේරත්න, පරිසර නියෝජ්ය අමාත්ය ඇන්ටන් ජයකොඩි, වයඹ පළාත් ආණ්ඩුකාර තිස්ස වර්ණසූරිය යන අය සහ පුත්තලම දිස්ත්රික්කයේ පක්ෂ විපක්ෂ පාර්ලිමේන්තු මන්ත්රීවරු, වයඹ පළාත් ලේකම් ඇතුළු පළාත් පාලන නියෝජිතයන්, මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම , පුත්තලම දිස්ත්රික් ලේකම්, ප්රාදේශීය ලේකම්වරු, රාජ්ය නිලධාරීන්, සහ ආරක්ෂක අංශ නියෝජිතයෝ ඇතුළු පිරිසක් මෙම අවස්ථාවට එක්ව සිටියා.
