ලිපි ලේඛන හොරෙන් හදලා එන්නත් විදගෙන

චිනයෙන් ගෙනා ජනතාවට ලබා දෙන එන්නත් වලින් මාත්‍රා දෙකක් පුද්ගලයන් දෙදෙනෙකු ව්‍යාජ ලිපි ලේඛන සකසා නිලධාරින් නොමග යවා එන්නත ලබා ගැනීමේ සිද්ධියක් සම්බන්ධයෙන් දඹුල්ල සහකාර පොලිස් අධිකාරී කාර්යාලය මගින් අද (12) දින සිට විශේෂ පරීක්ෂණයක් ආරම්භ කොට තිබෙනවා.

දඹුල්ල ජාතික පාසලේ  සිදු කෙරෙන එන්නත් ලබාදීමේ ක්‍රියාවලිය අවස්ථාවේදී ඊයේ (11) දින පස්වරුවේ දඹුල්ල නගරයේ ග්‍රාම සේවා වසමේ පදිංචි පුද්ගලයන් දෙදෙනෙකු මෙසේ ව්‍යාජ ලිපි ලේඛන සකසා එන්නත ලබා ගෙන ඇති බව දඹුල්ල ප්‍රාදේශීය ලේකම් කාර්යාලයෙන් පොලීිසියට පැමිණිල්ලක් ලැබී ඇතැයි දඹුල්ල සහකාර පොලිස් අධිකාරී ඒ.එස්.කේ.බණ්ඩාර මහතා පැවසුවා.

දඹුල්ල ප්‍රාදේශීය ලේකම් වරයාගේ අත්සනින් යුතුව දඹුල්ල ප්‍රදේශයේ වයස අවුරුදු 60ක් ඉක්ම වූ පුද්ගලයන් සඳහා එන්නත් කිරීම් සදහා මෙම පෝරම ග්‍රාම නිලධාරින් හරහා ලබාදී තිබෙනවා.

දඹුල්ල ප්‍රාදේශීය ලේකම් කාර්යාලය මඟින් ලේකම්වරයා ගේ අත්සනින් යුතුව නිකුත් කර ඇති එන්නත ලබා ගැනීමේදී පුරවන ලද කැමැත්ත ප්‍රකාශ කිරීමේ පෝරම දෙකක් ප්‍රාදේශීය ලේකම් කාර්යාලය තුලින්ම හොර රහසේ පිටතට ගොස් පුද්ගලයන් දෙදෙනකු මෙම එන්නත ලබා ගෙන ඇතැයි දැනට සිදු කරන ලද මූලික පරීක්ෂණවලදී අනාවරණය වී ඇතැයි දඹුල්ල සහකාර පොලිස් අධිකාරී බණ්ඩාර මහතා පවසනවා.

දඹුල්ල මුලස්ථාන පොලිස් පරීක්ෂක එස්.පි.එදිරිසිංහ මහතා මෙහි පැමිණිල්ල ගැඹුරින් විභාග කිරීම සඳහා දඹුල්ල සහකාර පොලිස් අධිකාරීවරයා යටතේ ක්‍රියාත්මක විශේෂ අපරාධ විමර්ශන අංශය වෙත භාරදී තිබෙනවා.

ඒ අනුව අද (12) දින විශේෂ පොලිස් කණ්ඩායමක් ව්‍යාජ ලෙස එන්නත් ලබා ගත් පුද්ගලයන් දෙදෙනා පුරවා ඇති පෝරම දෙක පොලිස් භාරයට ගෙන තිබෙනවා.

මෙරට තුල කොවිඩ් වෛරසය සදහා එන්නත්කරණයේදී විවිධාකාරයෙන් එන්නත් කිරීම් වලදී හිතවතුන් හට එන්නත ලබා දීම සිදුකරන සිද්ධීන් වාර්තා වුවද ඉතා සූක්ෂම ලෙස කැමැත්ත ප්‍රකාශ කිරීමේ පෝරම රහසිගතව අන්සතු කොට හෝ වියාජ ලේඛන සකසා එන්නත් ලබා ගැනීමේ සිද්ධීන් වාර්තා වී නැති බව පොලිසිය පවසයි.

මෙම ව්‍යාජ ලෙස  කූඨ ලේඛන සැකසූවේද දඹුල්ල ප්‍රාදේශීය ලේකම් කාර්යාලයේ තුලින් මෙම ලේඛන සොරාගෙන පිටස්තර අයට ලබා දුන්නේද යන්න වැඩිදුර පරීක්ෂණ පවත්වනු බවත් එමෙන්ම ග්‍රාම නිලධාරී වසම්වල වයස අවුරුදු 60 ඉක්ම වූ පුද්ගලයන්ට ලබා දෙන මෙම එන්නත් මාත්‍රා ව්‍යාජ ලෙස ලබාගෙන ඇත්තේ වයස අවුරුදු හතළිස් දෙකක් වයස අවුරුදු හතළිස් 45ක් යන වයස්වල දඹුල්ල නගරයේ පදිංචිකරුවන් බව පරීක්ෂණ පවත්වන විශේෂ අපරාධ විමර්ශනශන අංශයේ නිලධාරීහු පවසනවා.