රුපියල් ලක්ෂ 20ක අල්ලස් මුදලක් ලබාගත් සුරාබදු නිලධාරීන් තිදෙනෙක් උතුරු පළාත් අපරාධ කොට්ඨාසයේ නිලධාරීන් කණ්ඩායමක් විසින් අත්අඩංගුවට ගෙන තිබෙනවා.
ඊයේ (30) පස්වරුවේ වඩුක්කෝට්ටේ පොලිස් වසමේ වංකානේ ප්රදේශයේ දී මෙම අත්අඩංගුවට ගැනීම සිදුකළ බවයි පොලිසිය පවසන්නේ.
අත්අඩංගුවට ගැනුණු ප්රධාන සැකකරු ආරියම්පදි ප්රදේශයේ පදිංචි වයස අවුරුදු 36ක සුරාබදු නියාමකවරයෙක් වන අතර, අනෙක් සැකකරුවන් දෙදෙනා අල්ලස් ගැනීමට ආධාර අනුබල දුන් වයස අවුරුදු 32 සහ 48 යන වයස්වල පසුවන සුරාබදු පරීක්ෂකවරුන් දෙදෙනෙක් බවයි වාර්තා වුණේ.
පොලිස් මත්ද්රව්ය කාර්යාංශයේ නිලධාරීන් විසින් රඳවාගෙන සිටින හෙරෝයින් සන්තකයේ තබාගෙන සිටි පුද්ගලයකුට නඩුවක් නොදමා මුදාහැරීමට එම පුද්ගලයාගේ සහෝදරියගෙන් සැකකාර සුරාබදු නිලධාරීන් විසින් රුපියල් ලක්ෂ 20ක අල්ලස් මුදලක් ඉල්ලා ඇති බවයි වාර්තා වන්නේ.
එම මුදල අදාළ පුද්ගලයාව රඳවගෙන සිටින වංකානේ සුරා බදු කාර්යාලය අසල නිවසට ගෙනවිත් ලබාදෙන ලෙසයි පවසා ඇත්තේ.
අනතුරුව මේ සම්බන්ධයෙන් අදාළ සහෝදරිය උතුරු පළාත් අපරාධ කොට්ඨාසයට ඊයේ (30) දහවල් පැමිණිලි කර තිබෙනවා.
පසුව එම කාන්තාව අදාළ මුදල් ද රැගෙන ඊයේ (30) පස්වරුවේ වංකානේ සුරා බදු කාර්යාලය අසලට ගොස් ඇති අතර, එහිදී සැකකරුගේ ජංගම දුරකථනයෙන් ඇමතුමක් දී ඇයට පවසා ඇත්තේ මුදල් රැගෙන වංකානේ සුරා බදු කාර්යාලය අසළ පිහිටි නිවසට පැමිණෙන ලෙසයි.
පසුව ඇය එහි ගොස් අල්ලස් මුදල් ලබා දී සැකකාර සහෝදරයා බේරාගෙන නිවසින් පිටතට පැමිණීමේ පසු අදාළ නිවස වැටලූ උතුරු පළාත් අපරාධ කොට්ඨාසයේ නිලධාරීන් සැකකාර සුරාබදු නිලධාරීන් අත්අඩංගුවට ගෙන තිබෙනවා.
සුරාබදු නිලධාරීන් රඳවාගෙන සිටි සැකකරු තෙලිප්පලේ රෝහලට ඇතුළත් කර ඇති බවයි වාර්තා වන්නේ.
අත්අඩංගුවට ගැනුණු සැකකාර සුරාබදු නිලධාරීන් තිදෙනා අද (31) මල්ලාකම් අධිකරණය හමුවට ඉදිරිපත් කිරීමට නියමිතව තිබෙනවා.
