කොටදෙණියාව පොලිසිය විසින් සිදු කරන ලද මෙහෙයුමක දී රුපියල් ලක්ෂ 20ක රන් භාණ්ඩ සමඟ සැකකරුවන් තිදෙනෙක් සහ යතුරුපැදියක් අත් අඩංගුවට ගැනුණා.
අප ප්‍රාදේශීය වාර්තාකරු පැවසුවේ, මන්නා පිහි පෙන්වා මහමග ගමන් කරන පුද්ගලයින් බියවද්දා රන් ආභරණ පැහැර ගැනීමේ යෙදුණු මත්ලෝලී කල්ලියක සාමාජිකයින් තිදෙනෙක් මෙලෙස අත් අඩංගුවට ගැනුණු බවයි පැවසෙන්නේ.
මෙම මෙහෙයුමට කටාන පොලිසියේ ද සහාය ලැබී තිබෙනවා.
දේපළ පැහැරගැනීමට සැකකරුවන් ගමන් කිරීමට යොදාගත් නවීන පන්නයේ යතුරුපැදිය ඉකුත් පෙබරවාරි මාසයේ දී බෙම්මුල්ල පොලිස් වසමේ දී මන්නා පිහිය පෙන්වා තරුණයෙකු බිය ගන්වා පැහැර ගැනීමට භාවිත කරන ලද්දක් බවට ද හෙළි ව තිබෙනවා.
මේ වසරේ මුල් මාස කිහිපය තුළ දී මීරිගම – ගිරිඋල්ල, කොටදෙනියාව, පන්නල, දිවුලපිටිය, බෙම්මුල්ල, ගම්පහ ඇතුළු පොලිස් වසම් ගණනාවක මේ ආකාරයෙන් මන්නා පිහි පෙන්වා දේපොළ පැහැර ගැනීමේ සිද්ධි සම්බන්ධයෙන් පොලිස් ස්ථාන වෙත පැමිණිලි ලැබී තිබූ බවයි පොලිසිය පැවසුවේ.
අත්අඩංගුවට ගෙන ඇත්තේ කටාන, කටුවැල්ලේගම, මීරිගම සහ උල්ලලපොල පදිංචිකරුවන් තිදෙනෙක්.
අත්අඩංගුවට ගත් සැකකරුවන් තිදෙනා සමග රන් භාණ්ඩ අධිකරණයට ඉදිරිපත් කිරීමට නියමිත බව කොටදෙනියාව පොලිසි ස්ථානයේ ස්ථානාධිපති ප්‍රධාන පොලිස් පරීක්ෂක සාලිය ලක්මාල් පතිරාජ සූරිය මහතා පැවසුවා.
