නැගෙනහිර මධ්යම බෙංගාල බොක්ක ප්රදේශයේ වර්ධනය වූ ‘රිමාල්’ සුළි කුණාටුව බංග්ලාදේශය වෙත ඇතුළු වී තිබෙනවා.
කෙසේ වෙතත් එහි වක්ර බලපෑම තවදුරටත් මෙරටට එල්ල කරනු ඇතැයි කාළගුණ විද්යා දෙපාර්තමේන්තුව පෙන්වා දෙන්නේ.
දිවයිනට බලපා ඇති අයහපත් කාළගුණය හේතුවෙන් අත්තනගලු ඔය, කැළණි, කලු, ගිං සහ නිල්වලා යන ප්රධාන ගංගාවල ජල මට්ටම අවධානයෙන් සිටිය යුතු මට්ටමක් දක්වා ඉහළ ගොස් ඇතැයි වාරිමාර්ග දෙපාර්තමේන්තුව පවසනවා.
ඒ්, හේතුවෙන් එම ගංගා ආශ්රිත පහත් බිම්වල සිටින ජනතාව විමසිලිමත්ව කටයුතු කළ යුතුව ඇතැයි වාරිමාර්ග අධ්යක්ෂ එස්. පී. සී. සුගීෂ්වර ප්රකාශ කළා.
අයහපත් කාළගුණ තත්ත්වය හේතුවෙන් මාදම්පේ කටුපිටි ඔය පිටාර ගැලීම නිසා පීඩාවට පත් ජනතාවට සහන සැළසීම සඳහා නාවික හමුදාව පියවර ගෙන තිබුණා.
ගම්පොළ කුරුඳුවත්ත රාක්ෂාව ප්රදේශයේ වතු නිවාස පේළියකට ඊයේ පැවති දැඩි වර්ෂාව සහ සුළං තත්ත්වය හේතුවෙන් හානි සිදු වී තිබුණා.
ආපදා තත්ත්වය හේතුවෙන් පවුල් 25 කට අයත් පුද්ගලයින් 80 දෙනෙකු ප්රදේශයේ පාසලේ තාවකාලිකව රැඳවීමටයි පියවර ගෙන ඇත්තේ.
මේ අතර නිරිතදිග මෝසම් තත්ත්වය හේතුවෙන් පවතින සුළං තත්ත්වය තවදුරටත් බලාපොරොත්තුවන බව කාලගුණ විද්යා දෙපාර්තමේන්තුව පවසනවා.
කාලගුණ විද්යා දෙපාර්තමේන්තුව වැඩිදුරටත් සඳහන් කළේ සක්රීය වී ඇති නිරිත දිග මෝසම් කාලගුණය හේතුවෙන් දිවයින වටා මුහුදු ප්රදේශවල සහ බෙංගාල බොක්ක මුහුදු ප්රදේශවල තවදුරටත් ඉතා තද සුළං සමඟ ඉතා තද වැසි ඇතිවිය හැකි අතර මුහුදු ප්රදේශ ඉතා රළු විය හැකි බවයි.
