මොරටුව, රාවතාවත්ත ප්‍රදේශයේ රැකියා නියෝජිත ආයතනයකට තියුණු ආයුධයක් රැගෙන කඩා වැදි හිමිකරුට සහ සේවකයකුට පහරදී රුපියල් ලක්ෂ 25 කට ආසන්න රන් භාණ්ඩ සහ මුදල් කොල්ලකෑ සිව්දෙනාගේ කල්ලිය අත්අඩංගුවට ගත් බව බස්නාහිර පළාත් දකුණ දිශාව අපරාධ කොට්ඨාසය පවසනවා.
කොල්ල කන ලද දේපළ අතර පවුම් 12 1/2 ක් බර රන් මාලයක්, අත් පලඳලාවක්, මුදු තුනක්, පොලිසිය මඟින් සොයාගෙන තිබෙනවා.
කොල්ලකෑම සඳහා යොදාගත් දිගු මන්නා පිහිය ද පොලිස් භාරයට ගෙන ඇති බව සඳහන්.
අත්අඩංගුවට ගත් සැකකරුවන් අතර මීට පෙර ද අපරාධ රැසකට සම්බන්ධ රත්මලාන ප්‍රදේශයේ පදිංචි මුවා, ඩබලා හා පච්චයා යන පුද්ගලයන් සිටින බව පොලිසිය පවසනවා.
ඉකුත් 12 වෙනි දින සැකකරුවන් සිව් දෙනාගෙන් අයෙකු ආයතනයට මන්නා පිහියක් රැගෙන ඇතුළු වී හිමිකරු සහ සේවකයා බැඳ දමා පහරදී හිමිකරු පැළඳ සිටි පවුම් 12 1/2 බර රන් මාලය කොල්ලකා අනතුරුව රුපියල් 9000/= ක් හා ජංගම දුරකථනයක් කොල්ලකා පලා ගොස් තිබුණා.
ඒ සම්බන්ධයෙන් විමර්ශන පැවැත්වූ බස්නාහිර පළාත් දකුණු දිසාව අපරාධ කොට්ඨාසය, සැකකරුවන් පෑලියගොඩ
ප්‍රදේශයේ දෙමහල් ගොඩනැගිල්ලක් කුලී පදනම මත ලබාගෙන සැඟව සිටින බවට ලද තොරතුරකට අනුව එය වටලා සැකකරුවන් අත්අඩංගුවට ගෙන තිබෙනවා.
එම සැකකරුවන්ගෙන් සිදු කළ ප්‍රශ්න කිරීමේ දී කොල්ල කෑ රන් භාණ්ඩ වත්තල ග්‍රෑන්ඩ්පාස් බොරැල්ල හා දෙමටගොඩ ප්‍රදේශවලට උගස් තබා ඇති බවට අනාවරණය වීමෙන් අනතුරුව එම රන් භාණ්ඩ ද සොයාගත් බව පොලිසිය පවසනවා.
එම මුදල්වලින් සැකකරුවන් මත්කුඩු පානය කර ඇති බව සඳහන්.
සැකකරුවන් හඳුනාගැනීමේ පෙරට්ටුවක් සඳහා අද (21) දින ගල්කිස්ස මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
බස්නාහිර පළාත් දකුණු දිසාව අපරාධ කොට්ඨාසය වැඩිදුරට පරීක්ෂණ පවත්වනු ලබයි.
