රුපියල් කෝටි 900ක් පමණ වටිනා බව පවසමින් රුපියල් ලක්ෂ 200ක මුදලකට අලෙවි කිරීමට සූදානම් වූ රතු රසදිය අඩංගු බවට සඳහන් සිලින්ඩරයක් සමග සැකකරුවන් තිදෙනෙකු අත්අඩංගුවට ගත් බව පානදුර කොට්ඨාස අපරාධ විමර්ශන ඒකකය පවසනවා.
එල්.ටී.ටී.ඊ සංවිධානය විසින් භාවිතා කරන ලද සබ්මැරීන්වල තාක්ෂණය සඳහා යොදාගත් රතු රසදිය අඩංගු සිලින්ඩරයක් ඇති බවත්, එය මිල දී ගෙන පසුව ඉන්දියානු ධන කුවේරයෙකුට විශාල මුදලකට අලෙවි කිරීමට හැකි බවත් පානදුර ව්‍යාපාරිකයකුට දන්වා රැගෙන ආ සිලින්ඩරය අලෙවි කිරීමට සූදානම් වීමේ දී සැකකරුවන් අත්අඩංගුවට ගෙන ඇති බවයි වාර්තා වන්නේ.
සැකකරුවන් අත්අඩංගුවට ගෙන අඩි දෙකහමාරක් පමණ උසැති රතු රසදිය අඩංගු බව කියන සිලින්ඩරය සමග ඔවුන් පැමිණි මෝටර් රථය ද පොලිස් භාරයට ගැනුණා.
පොලිස් භාරයට ගත් සිලින්ඩරයේ රතු රසදිය බවට සඳහන් ද්‍රාවණය පරීක්ෂා කිරීමේ දී තිරුවානා, ග්‍රැනයිඩ් කළුගල් සහ වෙනත් පාෂාණයන් අඩංගු මිශ්‍ර ද්‍රව්‍යයක් තිබූ බව ද සඳහන් වනවා.
එම සිලින්ඩරය රජයේ රස පරීක්ෂක වෙත යවා වාර්තාවක් ලබා ගැනීමට නියමිත යි.
සැකකරුවන් පානදුර මහේස්ත්‍රාත් අධිකරණයට ඉදිරිපත් කිරීමට නියමිත ව තිබෙනවා.
