සෞඛ්‍ය වෘත්තීය සමිති 72ක් එක්ව ක්‍රියාත්මක කරන වැඩ වර්ජනය හේතුවෙන් දිවයින පුරා ප්‍රධාන රෝහල් රැසකට ඒවායේ කටයුතු සිදුකරගෙන යාම සඳහා යුද හමුදා භටපිරිස් යොදවා ඇති බව ශ්‍රී ලංකා යුද හමුදාව සඳහන් කළා.
ඒ, අනුව කොළඹ ජාතික රෝහල, මහනුවර ජාතික රෝහල , කලුබෝවිල, පේරාදෙණිය, මාතලේ, බදුල්ල සහ කුරුණෑගල ශික්ෂණ රෝහල්, මාතර, බලංගොඩ, අවිස්සාවල්ල, මුල්ලේරියාව, අංගොඩ, ඇහැළියගොඩ, නුවරඑළිය, නාවලපිටිය, මොණරාගල, හම්බන්තොට, දෙබරවැව, මැදිරිගිරිය, බකමූණ, හිඟුරක්ගොඩ, ගල්ඔය, හතරැස්කොටුව, දියබෙදුම, අරලගංවිල, දම්මින්න, මනම්පිටිය, පුලස්තිගම, ගල්අමුණ ඇතුළු දිවයින පුරා පිහිටි රජයේ රෝහල් 41කට මෙලෙස හමුදා භට පිරිස් කැඳවා තිබෙනවා.
ඒ, අනුව 829ක භටපිරිස් ප්‍රමාණයක් රෝහල් පද්ධතියේ දෛනික කටයුතු බාධාවකින් තොරව අඛණ්ඩව පවත්වාගෙන යාම සඳහා දැනට යොදවා ඇති බවයි වාර්තා වුණේ.
මේ අතර මෙම භටපිරිස්වලට අමතරව හදිසි අවශ්‍යතාවයක් ඇති වුවහොත් ඒ සඳහා යෙදවීම සඳහා අවශ්‍යය භටපිරිස් සූදානම් කරන ලෙසත් හමුදාධිපති ලුතිනන් ජෙනරල් විකුම් ලියනගේ උපදෙස් ලබා දී තිබෙනවා.
සෞඛ්‍ය වෘත්තීය සමිති අද (16) පෙරවරු 6.30 සිට ආරම්භ කළ සංකේත වැඩ වර්ජනය හේතුවෙන් දිවයින පුරා රෝහල්වලට පැමිණි රෝගීන් දැඩි අපහසුතාවයකට පත්ව තිබෙනවා.
