වසර 04ක් තුළදී මෙරට ස්ථාවර ආර්ථිකයක් ගොඩනැගීමට රජය ගෙන යන වැඩපිළිවෙළ සඳහා ප්රධාන සංචාරක නගරයක් වන නුවරඑළිය දිස්ත්රික්කයේ දායකත්වය උපරිමයෙන් ලබා ගැනීමට විධිමත් සැලැස්මක් ඔස්සේ කටයුතු කරන ලෙස ජනාධිපති රනිල් වික්රමසිංහ මහතා නිලධාරීන්ට අද උපදෙස් ලබා දුන්නා.
ජනාධිපතිවරයා මෙම උපදෙස් ලබා දුන්නේ නුවරඑළිය නගර සංවර්ධන සැලැස්ම පිළිබඳ අද (10) පෙරවරුවේ නුවරඑළිය දිස්ත්රික් ලේකම් කාර්යාලයේ පැවති සාකච්ඡාවේදී .
නුවරඑළිය දිස්ත්රික්කයේ දේශපාලන අධිකාරිය සහ රාජ්ය නිලධාරීන්ගේ සහභාගිත්වයෙන් පැවති මෙම සාකච්ඡාවේ දී නුවරඑළිය නව නගර සංවර්ධන සැලැස්ම සහ නුවරඑළිය සංචාරක සැලැස්ම එළිදැක්වීම ද සිදු කෙරිණි.
මෙහිදී අදහස් දැක්වූ ජනාධිපති රනිල් වික්රමසිංහ මහතා, රටේ ආර්ථිකය නැවත ගොඩනැගිය නොහැකි බව බොහෝ දෙනා සිතුවද ජාත්යන්තර මූල්ය අරමුදල හා රජය ඇතිකරගත් එකඟතාව සමග නැවත රටේ ආර්ථිකය පිළිබඳ නැවුම් බලාපොරොත්තුවක් තැබීමට සියලුදෙනාට අවස්ථාව ලැබුණු බව පැවසුවා.
නුවරඑළිය දිස්ත්රික්කයට පැමිණෙන දෙස් විදෙස් සංචාරකයන් ඉලක්ක කර ගනිමින් වසර පුරාම සංචාරකයන් ගෙන්වා ගත හැකි ආකර්ශණීය නගරයක් ලෙස එය සංවර්ධනය කිරීමේ අවශ්යතාවය ජනාධිපතිවරයා මෙහිදී අවධාරණය කළා.
සංචාරකයන්ගේ අවශ්යතා හඳුනාගනිමින් එම සැලසුම් සකස් කිරීමේ වැදගත්කම අවධාරණය කළ ජනාධිපති රනිල් වික්රමසිංහ මහතා විශාල ගොඩනැගිලි වෙනුවට විවේකීව ගත කළ හැකි සෞම්ය පරිසරයක් සමගින් එම සංවර්ධන සැලසුම් සකස් කිරීමේ වැදගත්කම පැහැදිළි කළා.
නුවරඑළිය නගරයේ වැසි ජලය බැස යාම සඳහා විධිමත් ක්රමවේදයක් නොතිබීම දීර්ඝකාලින ගැටලුවක් වන අතර ඒ සඳහා කඩිනම් වැඩපිළිළෙක් ක්රියාවට නංවන ලෙස හා පානීය ජල ගැටලුව විසඳීමට ද විශේෂ අවධානය යොමුකරන ලෙස ඔහි උපදෙස් දුන්නා.
නුවරඑළිය නගරය තුළ අවිධිමත් ලෙස ගොඩනැගිලි ඉදිකරනවා වෙනුවට නිසි සැලැස්මකට අනුව ඉදිකිරිම් සිදු කිරිමේ අවශ්යතාව පැහැදිළි කළ ජනාධිපති රනිල් වික්රමසිංහ මහතා විශාල ගොඩනැගිලි ඉදිකිරීම හේතුවෙන් නගරය විනාශ වී ඇති බවත් එය නිව්යෝර්ක් නගරයක් කරනවාද නුවරඑළිය ලෙස පවත්වාගෙන යනවාද කියා තීරණය කළ යුතු බවත් පැවසුවා
මධ්යම අධිවේගි මාර්ගයේ කටයුතු අවසන් වීමත් සමග නුවරඑළියට පැමිණෙන සංචාරකයන්ගේ ප්රමාණය ඉහළ යනු ඇති බව පෙන්වා දුන් ජනාධිපතිවරයා ඔවුන්ගේ පහසුකම් සංවර්ධනය සඳහා නිසි සැලැස්මක් යටතේ කටයුතු කිරීමේ වැදගත්කම පැහැදිළි කළා.
ආයෝජකයන්ට හෝ කිසිදු පාර්ශ්වයකට අවශ්ය ලෙස නුවරඑළිය දිස්ත්රික්කයේ සම්පත් විනාශ කිරීමට ඉඩ දිය නොහැකි බවත් පරිසර හිතකාමී සහ සැලසුම්සහගත සංවර්ධනයක් දිස්ත්රික්කය තුළ ඇති කළ යුතු බවත් ජනාධිපතිවරයා අවධාරණය කළා.
එමෙන්ම මෙම කටයුතුවලදී රාජ්ය නිලධාරීන් සහ දේශපාලන අධිකාරිය මනා සම්බන්ධීකරණයකින් කටයුතු කිරිමේ අවශ්යතාව පැහැදිළි කළ ඔහු සාම්ප්රදායික රාමුවෙන් බැහැරව අලුතින් සිතා රටට අවශ්ය අලුත් වැඩපිළිවෙළ සමග සියලුදෙනා පෙළගැසිය යුතු බව ද සඳහන් කළා.
නුවරඑළියේ විශ්වවිද්යාලයක් ස්ථාපිත කිරිම සහ සංචාරකයන් ඉලක්ක කර ගනිමින් රාමායන මධ්යස්ථානයක් ඇති කිරීම පිළිබඳව ද මෙහිදි සාකච්ඡා විය.
නානුඔය දුම්රියපොළ නවීකරණය කර ඒ සමීපයේ උසස් ප්රමිතියෙන් යුත් ආර්ථික මධ්යස්ථානයක් ස්ථාපිත කිරීමට ද නියමිතයි.
තුරඟ තරග පිටිය සහ වැව සංවර්ධනය, වැව අසළ රථගාල් පහසුකම් වැඩි දියුණු කිරීම, නුවරඑළිය නගරය තුළ විධිමත් ජල කළමනාකරණ වැඩපිළිවෙළක් කඩිනමින් ක්රියාවට නැංවීම පිළිබඳව මෙහිදී විශේෂ අවධානයක් යොමු වුණා.
අමාත්ය ජීවන් තොණ්ඩමන්, නුවරඑළිය දිස්ත්රික් පාර්ලිමේන්තු මන්ත්රීවරුන් වන එස්.බී. දිසානායක, සි.බී. රත්නායක, වී.එස්. රාධක්රිෂ්නන්, එම්. රමේෂ්වරන් යන මහත්වරුන්ද, ජනාධිපති ලේකම් සමන් ඒකනායක, නුවරඑළිය දිස්ත්රික් ලේකම් නන්දන ගලබඩ යන මහත්වරු ඇතුළු රාජ්ය නිලධාරින් පිරිසක් මෙම අවස්ථාවට එක්ව සිටියා.
