අද උදෑසන වන විට යුරියා පොහොර මෙට්‍රික් ටොන් 1500ක ප්‍රමාණයක් යුරියා පොහොර අත්‍යවශ්‍යව පැවැති දිස්ත්‍රික්ක කිහිපයකට පළමුවෙන් යැවීමට පියවර ගත් බව ලංකා පොහොර හා කොමර්ෂල් පොහොර සමාගම්වල සභාපති ආචාර්ය ජගත් පෙරේරා මහතා පවසනවා.
ඒ අනුව හම්බන්තොට, පොළොන්නරුව, කුරුණෑගල හා මඩකලපුව ඇතුළු දිස්ත්‍රික්ක කිහිපයකට එම පොහොර තොගය යොමු කළ බවයි ඔහු සඳහන් කළේ.
මෙම පොහොර තොගය පසුගිය සෙනසුරාදා මෙරටට ලැබූන මෙට්‍රික් ටොන් 22,500 තොගයට අයත් ඒවා යි.
මේ අතර යූරියා පොහොර මිල රුපියල් 9000 දක්වා අඩු කළ යුතු බැවින් මිල කමිටුව වහාම රැස්වී මිල තීරණය කරන ලෙස කෘෂිකර්ම අමාත්‍ය මහින්ද අමරවීර මහතා උපදෙස් ලබාදී තිබෙනවා.
හෙට (15) සිට යූරියා පොහොර කිලෝ ග්‍රෑම් 50ක මිටියක මිල රුපියල් 9000 දක්වා අඩු කිරීමටයි කෘෂිකර්ම අමාත්‍ය මහින්ද අමරවීර මහතා අමාත්‍ය මණ්ඩලයේ අනුමැතිය ලබා ගෙන ඇත්තේ.
යූරියා පොහොර සම්බන්ධව වෙළෙඳ පොළ මිල සැලකිල්ලට ගනිමින් මිල අඩු කිරීමේ තීරණය ඒ සඳහා පත් කළ මිල කමිටුව විසින් තීරණය කළ යුතු බවට අමාත්‍ය මණ්ඩලය නිර්දේශ කර තිබෙනවා.
ඒ අනුව මිල කමිටුව වහාම රැස්වී පොහොර මිල අඩු කිරීම සම්බන්ධව තීරණය කරන ලෙසටයි කෘෂිකර්ම අමාත්‍ය මහින්ද අමරවීර මහතා නිලධාරින්ට උපදෙස් දුන්නේ.
එම තීරණය පරිදි හෙට සිට යුරියා පොහොර මිල රුපියල් 9,000 දක්වා අඩු කෙරෙනු ඇති.
දැනට වෙළෙද පොළෙහි යූරියා පොහොර මිටියක මිල රුපියල් 10,000ක් වශයෙන් පවතිනවා.
කොළඹ වරායට පැමිණ ඇති යූරියා පොහොර නෞකාවේ අඩංගු පොහොර ගොඩ බෑම දැන් සිදු කෙරෙනවා.
