රුසියානු – යුක්රේන යුද ගැටුම් නතර කිරීම පිණිස සිදු කෙරෙන පූර්ව සාකච්ඡාවක් ලෙස ඇතැමුන් නිර්වචනය කර ඇති එක්සත් ජනපදයේ සහ රුසියානු රාජ්‍ය තාන්ත්‍රිකයින් දෙපළක් අද (18) රියාද් හි ඩිරියා මාලිගයේ දී මුණගැසුණා.
අල් ජසීරා පුවත් සේවයට අනුව එක්සත් ජනපද රාජ්‍ය ලේකම් මාර්කෝ රුබියෝ සහ රුසියාවේ විදේශ අමාත්‍ය සර්ජි ලැව්රොව් ඇතුළු අනෙකුත් ජ්‍යෙෂ්ඨ නිලධාරීන් මෙලෙස හමු වී ඇති බවයි වාර්තා වන්නේ.
මෙම සාකච්ඡා මේ මස අග දී අමෙරිකානු ජනාධිපති ඩොනල්ඩ් ට්‍රම්ප් සහ රුසියානු ජනාධිපති ව්ලැඩිමීර් පුටින් අතර නිල හමුවකට ද තුඩු දිය හැකි බවට ද දේශපාලනික ආරංචි මාර්ග පවසනවා.
වසර තුනකට පෙර ක්‍රෙම්ලිනය විසින් යුක්රේනය ආක්‍රමණය කිරීමෙන් පසු දෙරට අතර පළමු ඉහළ මට්ටමේ සාකච්ඡා සඳහා යි මෙලෙස එක්සත් ජනපද සහ රුසියානු නිලධාරීන් සෞදි අරාබියේ දී හමුවූයේ.
යුක්රේනයේ යුද්ධය අවසන් කිරීමට මාර්ගයක් සොයා ගැනීමේ හැකියාව පිළිබඳව අවධානය යොමු වුව ද,
එම සාකච්ඡාවලට කියෙව් හෝ යුරෝපීය නියෝජිතයන් සම්බන්ධ වී නැති බවත් පැවසෙනවා.
පැය හතරකට වැඩි කාලයක් පැවති සාකච්ඡාවලට යුක්රේන හෝ යුරෝපීය නිලධාරීන් නොපැමිණි බවත් සඳහන්.
මෙම යුද්ධය තවදුරටත් දිගු වුවහොත් ඩොනල්ඩ් ට්‍රම්ප්ගේ පාලනය යටතේ දී යුක්‍රේනයට ආධාර මුදල් අවසන් වීමට හැකි බවට ද අනතුරු අඟවා තිබෙනවා.
