ඉන්දීය අග්රාමාත්ය නරේන්ද්ර මෝදි ඊයේ (15) එක්සත් අරාබි එමීර් හි සංචාරයක නිරත වුණා.
ඔහු ඉන්දීය අග්රාමාත්යවරයා ලෙස එරට සංචාරය කරන අටවැනි අවස්ථාව මෙයයි.
දෙරට අතර සබඳතාවයේ පරිමාණය ඉන් මනාව පැහැදිලි වන්නක්.
ඉන්දියාව සහ එක්සත් අරාබි එමීර් රාජ්යය (UAE) අතර පවතින ද්විපාර්ශ්වික සබඳතාව වර්තමානය වන විට හුදෙක් රාජ්යතාන්ත්රික සබඳතාවකට එහා ගිය, ගෝලීය ආර්ථිකයේ සහ දේශපාලනයේ අනාගතය තීරණය කරන ප්රබල සහයෝගීතාවක් බවට පත්ව තිබෙනවා.
දෙරට අතර පවතින මෙම ශක්තිමත් මිත්රත්වය ලෝක අවධානයට ලක්ව ඇති ප්රධාන කරුණක්.
මෙම සබඳතාවයේ වඩාත්ම කැපී පෙනෙන සන්ධිස්ථානයක් වන්නේ “විස්තීර්ණ ආර්ථික හවුල්කාරිත්ව ගිවිසුම” (CEPA) යි.
මේ හරහා දෙරට අතර වෙළඳාම, ආයෝජන සහ තාක්ෂණික හුවමාරුව පෙර නොවූ විරූ මට්ටමකින් ඉහළ ගොස් තිබෙනවා.
විශේෂයෙන්ම බලශක්ති, යටිතල පහසුකම් සංවර්ධනය සහ ඩිජිටල් ආර්ථිකය යන ක්ෂේත්රවල සාර්ථකත්වය සඳහා මෙම ගිවිසුම මහෝපකාරී වී ඇති බව විදෙස් මාධ්ය වාර්තාවල සඳහන් වනවා.
ආර්ථික ක්ෂේත්රයට අමතරව, කලාපීය ස්ථාවරත්වය සහ ආරක්ෂාව වෙනුවෙන් ද දෙරට එකඟතාවෙන් කටයුතු කරනවා.
ත්රස්තවාදයට එරෙහි වීම, සමුද්රීය ආරක්ෂාව තහවුරු කිරීම සහ ආරක්ෂක අංශ අතර අත්දැකීම් හුවමාරු කරගැනීම සම්බන්ධයෙන් ඉන්දියාව සහ එක්සත් අරාබි එමීර් රාජ්යය සමීපව කටයුතු කරනු ලබනවා.
එමෙන්ම, මැදපෙරදිග සහ දකුණු ආසියානු කලාපය යා කරන ආර්ථික කොරිඩෝවන් (Economic Corridors) නිර්මාණය කිරීම කෙරෙහි ද දෙරටේම සෘජු දායකත්වය ලැබී තිබෙනවා.
මෙම මිත්රත්වයේ තවත් ප්රබල පැතිකඩක් වන්නේ දෙරට අතර පවතින සංස්කෘතික සහ මානව සබඳතාවයි. එක්සත් අරාබි එමීර් රාජ්යයේ වෙසෙන විශාලතම විදේශීය ප්රජාව වන්නේ ඉන්දියානුවන් වන අතර, ඔවුන් එමීර් රාජ්යයේ ආර්ථික වර්ධනයට මෙන්ම දෙරටේ සංස්කෘතික පාලම ශක්තිමත් කිරීමට ද සුවිශේෂී දායකත්වයක් සපයයි.
නූතන ලෝකයේ තාක්ෂණික දියුණුව, තිරසාර බලශක්ති ප්රභවයන් කරා ගමන් කිරීම සහ ගෝලීය අභියෝගයන්ට සාර්ථකව මුහුණ දීම සඳහා ඉන්දියාව සහ එක්සත් අරාබි එමීර් රාජ්යය අතර පවතින මෙම සහයෝගීතාව ඉදිරි දශක කිහිපය තුළ ලෝක දේශපාලන සහ ආර්ථික රටාව හැඩගැස්වීමේ ලා ප්රධානතම සාධකයක් වනු නොඅනුමානයි.
