මොරොක්කෝවේ බලගතු භූමිකම්පාවෙන් මියගිය සංඛ්යාව 2,000 ඉක්මවා ගොස් තිබෙනවා.
එරට අභ්යන්තර කටයුතු අමාත්යාංශය පවසන්නේ 1,400 කට වැඩි පිරිසකට බරපතල තුවාල සිදුවී ඇති බවයි.
තුවාලකරුවන්ගෙන් බහුතරයක් වාර්තා වී ඇත්තේ මරකේෂ් නගරයට දකුණින් පිහිටි පළාත්වල බව සඳහන්.
මෙම ව්යසනය හමුවේ හයවන මොහොමඩ් රජු දින තුනක ජාතික ශෝක කාලයක් ප්රකාශයට පත් කළ අතර දිවි ගලවා ගත් අයට නවාතැන්, ආහාර, ඖෂධ සහ වෙනත් උපකාර ලබාදීමට ද නියෝග කර තිබෙනවා.
විදෙස් මාධ්ය වාර්තා කළේ බොහෝ පිරිසක් එළිමහනේ දෙවන දිනටත් රාත්රිය ගත කරන බවයි.
සිකුරාදා රාත්රියේ රික්ටර් මාපකයේ 6.8ක ප්රබලත්වයෙන් යුත් භූමිකම්පාව Marrakesh සහ බොහෝ නගරවලට බලපෑම් සිදු කළ අතර දුරස්ථ කඳුකර ප්රදේශවල ගම්මානයක් සම්පුර්ණයෙන්ම විනාශ වී ඇති බවයි වාර්තා වන්නේ.
සංචාරකයින් අතර ජනප්රිය ලෝක උරුම නගරයක් වන Marrakesh සිට නිරිත දෙසින් ඇට්ලස් කඳුකරය භූ කම්නපනයේ කේන්ද්රස්ථානය ලෙසට හඳුනාගෙන තිබෙනවා.
නමුත් කම්පනය කිලෝමීටර් 350ක් පමණ දුරින් පිහිටි රබාට් අගනුවරට මෙන්ම කැසබ්ලැන්කා, අගාදිර් සහ එසවුරා වෙත ද දැනී ඇතැයි සඳහන්.
මොරොක්කෝවේ අභ්යන්තර කටයුතු අමාත්යාංශය පවසන්නේ අල් හවුස් පළාතේ වැඩිම මරණ සංඛ්යාවක් වාර්තා වන අතර දෙවනුවට වැඩිම මරණ වාර්තා වී ඇත්තේ තාරූඩන්ට් පළාතෙන් බවයි.
යුනෙස්කෝව විසින් ලෝක උරුමයක් ලෙසට නම් කෙරුණු මරකේෂ් පැරණි නගරයට සැලකිය යුතු හානියක් සිදුවී ඇතත්, මරණ සංඛ්යාව වාර්තා වී ඇත්තේ ඉතා අඩුවෙන්.
කඳුකර ගම්මානවල ගල් සහ දැව නිවාස කඩා වැටී ඇති බවට විශ්වාස කෙරෙන අතර දුරස්ථ ප්රදේශවල විනාශයේ පරිමාණය තක්සේරු කිරීමට යම් කාලයක් ගතවනු ඇති බවයි බලධාරීන් ප්රකාශ කර ඇත්තේ.
