මෙරටට කුෂ් ගෙනා බ්‍රිතාන්‍ය කත තවදුරටත් රිමාන්ඩ්

ශ්‍රී ලංකා ගුවන් තොටුපොළේ රේගු ඉතිහාසයේ ගුවන් තොටුපොළක දී අත්අඩංගුවට ගත් විශාලතම කුෂ් තොගය වන කිලෝග්‍රෑම් 46යි ග්‍රෑම් 60ක් සමග අත්අඩංගුවට ගත් බ්‍රිතාන්‍ය ජාතික ගුවන් සේවිකාවක වන 21 හැවිරිදි චාලට් මේ ලී නම් කාන්තාව තවදුරටත් ලබන ජුලි 23 දක්වා රක්ෂිත බන්ධනාගාරගත කරන ලෙස මීගමුව අතිරේක මහේස්ත්‍රාත් දර්ෂිමා ප්‍රේමරත්න මහත්මිය නියෝග කර තිබෙනවා.

දසත අධිකරණ වාර්තාකාරිණිය පැවසුවේ, මීගමුව බන්ධනාගාරය මගින් මීගමුව මහෙස්ත්‍රාත් අංක 02 අධිකරණයට ඉදිරිපත් කිරීමේ දී අතිරේක මහේස්ත්‍රාත්වරිය විසින් අද (09) නියෝග කරනු ලැබුවා.

විෂ වර්ග, අබිං සහ අන්තරාදායක ඖෂධ පනතේ අංක 54 (A) යටතේ ආනයනය කිරීම, ජාවරාම් කිරීම සහ සන්තකයේ තබා ගැනීම යන චෝදනා යටතේ වැඩිදුර වාර්තාවක් පොලිස් මත්ද්‍රව්‍ය නාශක කාර්‍යාංශයේ පොලිස් සැරයන් ආර්.එම්.එස් කුමාර මහතා විසින් ඉදිරිපත් කරනු ලැබුවා.

නඩුව කැඳවු අවස්ථාවේ දී මත්ද්‍රව්‍ය නාශක කාර්යාංශය වැඩිදුර වාර්තාවක් ඉදිරිපත් කරමින් සඳහන් කළේ අත්අඩංගුවට ගත් කුෂ් මත්ද්‍රව්‍ය තොගය ජුනි 11 වැනිදා රජයේ රස පරික්ෂක දෙපාර්තමේන්තුවට යොමු කළ බවත් එම වාර්තා ඉදිරියේ දී අධිකරණයට ඉදිරිපත් කරන බවත්ය.

එහි පරීක්ෂණ අපරාධ පරික්ෂණ දෙපාර්තමේන්තුවට යොමු කර ඇති බැවින් එම වාර්තාව ද ඉදිරියේ දී ඉදිරිපත් කරන බව සඳහන් කෙරුණා.

එමෙන්ම සැකකාරියගේ ගුවන් ගමන් බලපත්‍රය සම්බන්ධයෙන් වාර්තාවක් කැඳවා ඇති අතර එම වාර්තාව ද මේ වන තෙක් ලබා ගැනීමට හැකියාවක් නොලැබුණු බව ද සඳහන් කළා.

දුඹුරු පැහැති ගවුමකින් සැරසි සිටි ඇයව මීගමුව බන්ධනාගාරය මගින් අධිකරණයට ඉදිරිපත් කර තිබුණා.

ඉදිරිපත් වූ කරුණු සලකා බැලු මහේස්ත්‍රාත්වරිය ඇයව තවදුරටත් ලබන ජුලි 23 දක්වා රක්ෂිත බන්ධනාගාරගත කරන ලෙස නියෝග කළා.

සැකකාරිය වෙනුවෙන් නීතිඥ සම්පත් පෙරේරා, නීතිඥ ගයාන් කලටුවාව, නීතිඥ ඒෂාන් සඳුන්ගහවත්ත, නීතිඥ මහිෂා මුදුගමුව යන නීතිඥවරු පෙනී සිටියා.

මේ වන තුරු ඇයගේ පවුලේ කිසිවෙකු මෙරටට නොපැමිණීම සහ අධිකරණයට ඥාතීන් කිසිවෙකු නොපැමිණීම ද විශේෂත්වයක්.

දකුණු ලන්ඩනයේ සිට පැමිණි 21 හැවිරිදි චාලට් මේ ලී මේ මස මුල දී රට තුළට නීති විරෝධී ලෙස ගෙන ඒමට උත්සාහ කළ බවට රේගු නිලධාරීන් චෝදනා කරමින් මත්ද්‍රව්‍ය මළු සමඟ ඉකුත් මැයි 13 වැනිදා ශ්‍රී ලංකා රේගුව මගින් අත්අඩංගුවට ගත්තා.

හිටපු ගුවන් සේවිකාවක වන ඇය සඳහන් කළේ ඇගේ ගමන් මළුවල මත්ද්‍රව්‍ය ඇති බව දැන සිටීම ප්‍රතික්ෂේප කරන බවත් ඒවා කිසිවකු එහි තැන්පත් කර ඇති බවත්ය.

මේ වන විට ඇය දින 60කට අසාන්න කාලයක් බන්ධනාගාරගතව සිටිනවා.

එහිදී ඇය වෙනුවෙන් පෙනී සිටින ජ්‍යේෂ්ඨ නීතිඥ සම්පත් පෙරේරා මහතා සඳහන් කළේ ඇය වෙනුවෙන් ඇප අයැදුම්පතක් මීගමුව මහාධිකරණය වෙත ඉදිරියේ දී යොමු කරන බවයි.