මිලර්ගේ අපතේ ගිය එක්දින ශතකය කිවියන්ට ජයගෙනා හැටි

මෙවර චැම්පියන්ස් කුසලානයේ අවසන් මහා තරගයට ඉන්දියාවට එරෙහිව මාර්තු 09 වැනි දින තරග වදින කණ්ඩායම බවට නවසීලන්තය පත් වුණා.

ඒ ප්‍රබල දකුණු අප්‍රිකානු කණ්ඩායම ලකුණු 50කින් අවසන් පූර්ව තරගයේ දී පරාජයට පත් කරමින්.

කාසියේ වාසිය දිනූ නවසීලන්ත නායක මිචෙල් සැන්ට්නර් පළමු ව පන්දුවට පහරදීමට තීරණය කළා.

එම තීරණයට උපරිම වගකීම් ඉටු කරමින් රචින් රවීන්ද්‍රා සහ කේන් විලියම්සන් එක් ව ලකුණු 164ක ශක්තිමත් සබඳතාවක් ගොඩනගමින් දෙදෙනා ම එක්දින ශතක වාර්තා කරගත්තා.

රවීන්ද්‍රා ලකුණු 108ක් සහ විලියම්සන් ලකුණු 102ක් ලබා ගැනීමට සමත් වුණා.

ග්ලේන් ප්ලිප්ස් නොදැවී ලකුණු 49ක් සහ ඩැරිල් මිචෙල් ලකුණු 49ක් ලබා ගත්තා.

ජයග්‍රහණය සඳහා දකුණු අප්‍රිකාවට ලකුණු 363ක ඉලක්කයක් හිමි වන විට නවසීලන්තයේ කඩුලු 06ක් ද බිඳ වැටී තිබුණා.

කෙසේවෙතත් දකුණු අප්‍රිකාවට කිවි පන්දු යවන්නන් ජයග්‍රාහී ලකුණු සීමාව වෙත ගමන් කිරීමට ඉඩ ලබා දුන්නේ නැහැ.

පන්දුවාර 50 අවසානයේ කඩුලු 09ක් දැවී දකුණු අප්‍රිකාවට ලබාගත හැකි වූයේ ලකුණු 312ක් පමණයි.

හුදෙකලා සටනක ජයග්‍රහණයට අත පොවන්නට තැත් කළ ඩේවිඩ් මිලර් නොදැවී ලකුණු 100ක් රැස් කළ පන්දු 67කට වන අතර ඊට හයේ පහර 04ක් සහ හතරේ පහර 10ක් ඇතුළත් වුණා.

නමුත් සෙසු පිතිකරුවන්ගෙන් කණ්ඩායමට ලැබුණු ලකුණු ජයග්‍රහණයක් සඳහා ප්‍රමාණවත් නොවීම මත මිලර්ගේ අගනා ශතකය අපතේ ගිය අයුරුයි දක්නට ලැබුණේ.

Rassie van der Dussen ලකුණු 69ක් සහ ටෙම්බා බවුමා ලකුණු 56ක් ලබා ගත්තා.

කඩුලු බිඳ දැමීමේ දී මිචෙල් සැන්ට්නර් කඩුලු 03ක්, පිලිප්ස් සහ මැට් හෙන්‍රි කඩුලු 02ක බැගින් මෙන් ම එක් කඩුල්ල බැගින් මිචෙල් බ්‍රේස්වෙල් සහ රචින් රවීන්ද්‍රා විසින් බිඳ හෙලනු ලැබුවා.

තරගයේ වීරයා සම්මානය පිත්තෙන්, පන්දුවෙන් සහ උඩ පන්දු දෙකක් රැක ගැනීමෙන් දක්ෂතා දැක්වූ රචින් රවීන්ද්‍රා හට හිමිවුණා.