මැදපෙරදිගින් ඇහෙන තවත් කඳුලු කතාවක් – ”මට නිරුවතින් නාන්න කියනවා”

මෙරට පවතින ආර්ථික දුෂ්කරතා බොහෝ දෙනෙක් මැද පෙරදිග ගෘහ සේවය සඳහා යොමුවීම පසුගිය කාලය තුළ සුලබව දක්නට ලැබුණා.

නමුත් එහි ගිය ඇතමෙකුට දරන්නට සිදු ව ඇති පීඩා අපමණයි.

මේ මැද පෙරදිගින් ඇසෙන එවැනි තවත් කදුලු කතාවක්.

අනුරාධපුර හොරොව්පතාන – මොරකෑව පදිංචි ශාලිකා ලක්මාලි මීට වසර එක හමාරකට පමණ පෙර සෞදි අරාබියේ ගෘහ සේවය සඳහා පිටත්ව යන්නේ තම නිවසේ පැවති අනේක විධ දුක් කම්කටොලු තවදුරටත් ඉවසා ගැනීමට නොහැකිවයි.

විදේශ සේවා නියුක්ති කාර්යංශයේ ලියාපදිංචි කුරුණෑගල ප්‍රදේශයේ පිහිටි විදේශ රැකියා නියෝජිත ආයතනයක් හරහා 2022 වර්ෂයේ නොවැම්බර් මස 21 වැනිදා ඇය සෞදි අරාබිය බලා පිටත්ව යනවා.

රියාද් නගරයේ පිහිටි රැකියා නියෝජිත ආයතනයක් හරහා ඇය ගෘහ සේවය සඳහා රියාද් නගරයේ පිහිටි නිවසකට යොමු කර ඇති අතර එහිදී ඇයට විඳින්නට සිදුව ඇත්තේ කිසිසේත්ම අපේක්ෂා නොකළ තරම් වද බන්ධනයි.

නිවැසියන් ඉදිරියේ නිරුවත්වීමට මෙන්ම නිවැසියන් බලා සිටියදී දියනෑමට පවා සිදු ව ඇතැයි ශාලිකා ලක්මාලි පවසනවා.

ඇයගේ පවුලේ ඥාතීන් පවසන්නේ මේ සම්බන්ධයෙන් විදේශ සේවා නියුක්ති කාර්යංශයේ අනුරාධපුර කාර්යාලයට මෙන්ම ඇය රැකියාව සඳහා පිටත්ව ගිය කුරුණෑගල පිහිටි විදේශ රැකියා නියෝජිතායතනයට මේ සම්බන්ධයෙන් පැමිණිලි
කර ඇතත් කිසිදු සහනයක් නොලැබුණු බවයි.