ආගමන විගමන දෙපාර්තමේන්තුවේ මහනුවර ප්‍රාදේශීය කාර්යාලයට දෛනිකව පැමිණෙන ජනතාව ඇතුළු කර ගැනීමට විධිමත් වැඩපිළිවෙළක් සකස් කිරීමට එහි බලධාරීන් අපොහොසත් වීම නිසා පැමිණෙන ජනතාව දැඩි දුෂ්කරතාවට පත්ව සිටියි.
මෙම කාර්යාලයෙන් එක්දින සේවාව යටතේ දෛනිකව විදේශ ගමන් බලපත්‍ර 200 ක් නිකුත් කරන නමුත් එම සේවාව ලබා ගැනීමට දිවයිනේ විවිධ ප්‍රදේශවලින් දහසකට අධික පිරිසක් පැමිණෙයි.
පෙර දින පස්වරුවේ පෝලිමට එකතු වන පිරිස පසුදින පෙරවරු 8.00 ට කාර්යාලය විවෘත කරන තෙක්ම රැඳී සිටින්නේ මහනුවර පේරාදෙණිය ප්‍රධාන මාර්ගයේයි.
එක්දින සේවාව යටතේ නොම්මර 200 ක් ද සාමාන්‍ය සේවා යටතේ නොම්මර 175 ක් ද නිකුත් කරන අතර මෙම නොම්මර ලබා ගැනීම සඳහා පවතින දැඩි තරඟාකරීත්වය හේතුවෙන් කටුකැලේ, සුදුහුම්පොළ ප්‍රදේශ වල පදිංචිකරුවන් මධ්‍යම රාත්‍රියේ සිට පෝලිමේ රැඳී සිට ලබා ගන්නා නොම්මර සේවා ලබා ගැනීමට පැමිණෙන පුද්ගලයින්ට රුපියල් 3000-5000 ත් අතර මුදලකට හෝ ඊට වැඩි මුදලකට අ‍ළෙවි කිරීමේ ජාවාරමක් ක්‍රියාත්මක වෙමින් තිබෙන බව එහි පැමිණෙන මහජනතාව පවසනවා.
මෙම ජාවාරමට කාර්යාලයේ ඇතැම් පුද්ගලයින් ගේද සහය හිමියන බවට සේවා ලබා ගැනීමට පැමිණෙන ජනතාව චෝදනා කර සිටිනවා.
නොම්බර ලබා දීමේ දී ඇති වූ ගැටලුවක් සම්බන්ධයෙන් ඊයේ (28)දින එම ස්ථානයේ දැඩි නොසන්සුන්තාවක් ඇති වූ අතර මහනුවර පොලිස් මූලස්ථානාධිපති ප්‍රධාන පොලිස් පරීක්ෂකවරයා ඇතුළු කණ්ඩායමක් ගොස් එය පාලනය කරනු ලැබුවා.
එහි දී විදේශ ගමන් බලපත්‍රයක් ලබා ගැනීම සඳහා රැය පහන් කරමින් සිටින ජනතාවට නොම්මර ලබාදීම සඳහා ක්‍රමවත් වැඩපිළිවෙළක් සකස් කරන ලෙස ආගමන විගමන දෙපාර්තමේන්තුවේ මහනුවර ප්‍රාදේශීය කාර්යාල නිලධාරීන්ට දැනුම් දුන් බව පොලීසිය පවසනවා.
මේ සම්බන්ධයෙන් කරුණු විමසීමට කාර්යාලයේ දුරකතන අංකය ඇමතූ අවස්ථාවේ පිළිතුරු දුන් සේවකයෙකු පැවසුවේ, නියෝජ්‍ය පාලකවරිය කාර්ය බහුල බැවින් පසුව කතා කරන ලෙස වුවද දුරකථනයෙන් බලධාරියකු සම්බන්ධ කර ගැනීමට බොහෝ විට නොහැකි බව එහි පැමිණ සිටි ජනතාව කියා සිටියා.
