මාළඹේ කහන්තොට ප්‍රදේශයේ මවක් තම දරුවන් තුන්දෙනා සමග වස පානය කර සිය දිවි හානි කරගෙන තිබෙනවා.
මියගොස් ඇත්තේ 35 හැවිරිදි කාන්තාවක් වන අතර දරුවන් අවුරුදු 06, 08 සහ 09 වයස්වල පසුවන බවටයි අනාවරණ වී ඇත්තේ.
පිරිමි දරුවන් දෙදෙනෙක් සහ එක් ගැහැණු දරුවෙක් ඒ අතර වනවා. මියගොස් ඇති ගැහැණු දරුවාගේ වයස අවුරුදු 6ක් බවයි පොලිසිය සඳහන් කළේ.
මෙම කාන්තාවගේ සැමියා ද පසුගිය 28 වනදා වස පානය කර සිය දිවි හානි කරගෙන තිබුණා.
ඒ හේතුවෙන් ඇති වූ සිත්තැවුලක් මත මෙම කාන්තාව ඊයේ රාත්‍රී සිය දරුවන් තිදෙනා සමඟ මෙලෙස සියදිවි හානි කරගෙන ඇති බවටයි පොලිසිය සැක පළ කරන්නේ.
දරුවන් තිදෙනා රෝහල්ගත කිරීමටත් පෙර මිය ගොස් ඇති අතර, මව මාලඹේ නෙවිල් ප්‍රනාන්දු රෝහලට ඇතුළත් කිරීමෙන් අනතුරුව මියගොස් තිබූ බව සඳහන්.
මහේස්ත්‍රාත් පරීක්ෂණයෙන් අනතුරුව මෘත ශරීරය මාළඹේ නෙවිල් ප්‍රනාන්දු රෝහලේ මෘත ශරීරාගාරයේ තැන්පත් කර තිබෙනවා.
මළ සිරුරු සම්බන්ධයෙන් පශ්චාත් මරණ පරීක්ෂණය පැවැත්වීමට නියමිතයි.
සිය දිවි නසා ගැනීමට නිශ්චිත හේතුවක් මෙතෙක් අනාවරණ වී නොමැති අතර සිද්ධිය සම්බන්ධයෙන් පොලිස් පරීක්ෂණ ක්‍රියාත්මකයි.
