විස්සෙන් පහළ ආසියානු මලල ක්රීඩා ශුරතාවලියට සහභාගී වූ ශ්රී ලංකා කණ්ඩායම අද (29) අලුයම කටුනායක ගුවන් තොටුපොළෙන් දිවයිනට පැමිණියා.
ශ්රී ලංකා කණ්ඩායම අද (29) අලුයම 01.00ට ඩුබායි සිට පැමිණි ෆ්ලයි ඩුබායි ගුවන් සේවයේ එෆ්.ඉසෙඩ් – 569 දරණ ගුවන් යානයෙන් කටුනායක ගුවන් තොටුපොළ වෙත පැමිණි බවයි ගුවන් තොටුපොළ අප වාර්තාකරු සඳහන් කළේ.
පසුගිය 24 වනදා සිට 27 වනදා දක්වා මෙම තරගාවලිය එක්සත් අරාබි එමීර් රාජ්යයේ ඩුබායි පැවැත් වුණා.
මෙම තරගාවලියේ දී ශ්රී ලංකාව රිදී පදක්කම් 02ක් සහ ලෝකඩ පදක්කම් 03ක් දිනාගනිමින් සමස්ත පදක්කම් පහක් දිනාගත්තා.
දිවයිනට පැමිණි වයස අවුරුදු විස්සෙන් පහළ ආසියානු මළළ ක්රීඩා කණ්ඩායම පිළිගැනීම සඳහා එම ක්රීඩක ක්රීඩිකාවන්ගේ දෙමාපියන්, ඔවුන් ඉගෙනුම ලබන පාසල්වල ගුරු භවතුන් ඇතුළු පිරිසක් එක්ව සිටියා.
මෙවර තරගාවලියට රටවල් 34ක ක්රීඩක ක්රීඩිකාවන් සහභාගී වී සිටි අතර, එහිදී තුන් පිම්ම කාන්තා සහ මීටර් 100 X 4 පිරිමි සහාය දිවීම ඉසව්වෙන් වාර්තාවක් ද තබමින් රිදී පදක්කම් 02ක් දිනාගැනීමට සමත් වුණා.
මීට අමතරව මීටර් 400 X 4 සහාය දිවීම පිරිමි, ගැහැණු සහ මිශ්ර යන ඉසව්වලින් ලෝකඩ පදක්කම් 03ක් දිනා ගැනීමට ද ශ්රී ලංකාවට හැකියාව ලැබුණා.
