කුරුණෑගල බුවනෙකබා රාජ සභා ගොඩනැගිල්ල කඩා ඉවත් කිරීමේ සිද්ධිය සම්බන්ධයෙන් වරදකරු වී වසර තුනක සිර දඬුවම් නියම වී සිටි කුරුණෑගල හිටපු නගරාධිපති තුෂාර සංජීව විතාරණ ඇතුළු විත්තිකරුවන් පස් දෙනෙකුගේ සිර දඬුවම් කාලය වසරක් දක්වා අඩු කිරීමට අභියාචනාධිකරණය අද (18) නියෝග කළා.
කුරුණෑගල නගර මධ්‍යයේ පිහිටි බුවනෙකභා රාජසභා මණ්ඩලය කඩා දැමීමේ සිද්ධිය සම්බන්ධ ව නීතිපතිවරයා විසින් මහාධිකරණය හමුවේ ගොනු කර තිබූ චෝදනා පත්‍රය හා එම චෝදනා පත්‍රය අනුව කුරුණෑගල මහාධිකරණය විසින් නියම කළ සිර දඬුවම් ඇතුළු දණ්ඩන නියෝග අභියෝගයට ලක් කරමින් විත්තිකරුවන් විසින් ගොනු කළ අභියාචන පෙත්සම් සලකා බැලූ අභියාචනාධිකරණය මෙම නියෝගය ලබා දුන්නා.
අභියාචනය අද දින සම්පත් අබේකෝන්, පී. කුමාරත්නම් යන විනිසුරු මඬුල්ල හමුවේ කැඳවූවා.
2020 වසරේ කුරුණෑගල බුවනෙකබා රාජ සභා ගොඩනැගිල්ල කඩා ඉවත් කිරීමේ සිද්ධිය සම්බන්ධයෙන් වූ චෝදනාවන්ට කුරුණෑගල හිටපු නගරාධිපති තුෂාර සංජීව විතාරණ ඇතුළු විත්තිකරුවන් පස් දෙනෙකු කුරුණෑගල මහාධිකරණය හමුවේ වරද පිළිගත් අතර ඉන් අනතුරුව ඔවුන්ට බරපතළ වැඩ සහිත වසර තුනක් බැගින් සිරදඬුවම් සහ දඩ නියම කරනු ලැබුවා.
කෙසේවෙතත් විත්තිකරුවන්ට ලබා දුන් එම දණ්ඩන නියෝග සහ සිර දඬුවම් පෙත්සම්කරුවන් වෙනුවෙන් පෙනී සිටි නීතිඥවරු පෙර නඩු වාරයන්හි අධිකරණයේ කරුණු දක්වමින් කියා සිටියේ සිය සේවාදායකයා ඇතුළු විත්තිකරුවන්ට එරෙහි ව නීතිපතිවරයා විසින් කුරුණෑගල මහාධිකරණය හමුවේ ගොනු කර ඇති චෝදනා වැරැදි සහගත බවයි.
පෙත්සම්කරුවන් වෙනුවෙන් ජනාධිපති නිතිඥ ප්‍රියන්ත නාවන ඇතුළු නීතිඥ මඬුල්ලක් පෙනී සිටියා.
