රියදුරන් මත්ද්රව්ය භාවිත කර ඇත්දැයි යන්න පරීක්ෂා කිරීම සඳහා ඇති උපකරණ මෙරටට ගෙන්වීමේදී ප්රසම්පාදන ක්රියාවලිය හා පවතින නීතිමය බාධක ලිහිල් කිරීම සඳහා අවශ්ය ක්රියාමාර්ග අන්තරායකර ඖෂධ පාලක ජාතික මණ්ඩලය මූලික වෙමින් ගත යුතු බව රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්රී නජිත් ඉන්දික පැවසුවා.
ඒ එම කාරක සභාව පසුගියදා (20) පාර්ලිමේන්තුවේදී රැස්වූ අවස්ථාවේදීයි.
මෙදින කාරක සභාවේදී මහජන ආරක්ෂක සහ පාර්ලිමේන්තු කටයුතු අමාත්යාංශය සහ රාජ්ය පරිපාලන, පළාත් සභා සහ පළාත් පාලන අමාත්යාංශය සඳහා වූ 2025 අයවැය යෝජනාවල ප්රගතිය සහ විශේෂ ව්යාපෘති ක්රියාත්මක කිරීම සමාලෝචනය කිරීම සිදුවුණා.
මෙම රැස්වීම සඳහා සහභාගී වූ ශ්රී ලංකා පොලිසියේ මත්ද්රව්ය පාලන කාර්යාංශයේ නිලධාරීන් අදහස් දක්වමින් අදාළ උපකරණ නොමැතිව එම පරීක්ෂා කිරීම සිදුකිරීමේ අපහසුතාව කාරක සභාවේ අවධානයට යොමු කළා.
මෙහිදී අදහස් දක්වමින් කාරක සභා සභාපතිවරයා රජය මත්ද්රව්ය තුරන් කිරීම සඳහා දැඩි අවධානයක් යොමු කර ඇති අතරම, මත්ද්රව්ය පානය කර රිය ධාවනය කරන රියදුරන් පාලනය කිරීමේ අවශ්යතාවයක් පවතින බව අවධාරණය කළේ.
තවද මත්ද්රව්ය භාවිත කරන්නන් හඳුනා ගැනීම සඳහා පවතින මෙවලම් විශේෂ අවශ්යතාවයක් පවතින ඒවා බැවින්, එම උපකරණ ප්රසම්පාදනය සඳහා ඇති නීතිමය බාධක ලිහිල් කිරීම කෙරෙහි අවධානය යොමු කිරීමේ අවශ්යතාවයක් පවතින බව ද කාරක සභා සභාපතිවරයා වැඩි දුරටත් අදහස් දක්වමින් පෙන්වා දුන්නා.
මෙහිදී මත්ද්රව්ය නිවාරණ කටයුතු සඳහා අයවැයගත ව්යාපෘති ක්රියාත්මක කිරීමේදී ප්රගතියක් ලබා ඇති බව පොලිස් නිලධාරීන් කාරක සභාවට පැවසුවා.
තවද මහජන ආරක්ෂක සහ පාර්ලිමේන්තු කටයුතු අමාත්යාංශය යටතේ ඇති අන්තරායකර ඖෂධ පාලක ජාතික මණ්ඩලයේ නිලධාරීන් ද තම මණ්ඩලයේ ප්රගතිය පිළිබඳව කාරක සභාවට දැනුම් දුන්නා.
මේ අතර, රාජ්ය පරිපාලන, පළාත් සභා සහ පළාත් පාලන අමාත්යාංශයේ අයවැය යෝජනාවල ප්රගතිය පිළිබඳව ද කාරක සභාවේ අවධානය යොමු වුණා.
2025 වසරේ යෝජනාවල සැළකිය යුතු ප්රගතියක් ලබා ඇති බවත්, අත්හිටුවා තිබූ බොහෝ සංවර්ධන ව්යාපෘති නැවත ආරම්භ කර ක්රියාත්මක කරමින් පවතින බවත් අමාත්යාංශ ලේකම්වරයා මෙහිදී අදහස් දක්වමින් සඳහන් කළා.
