බියගම නිදහස් වෙළෙඳ කලාපය උදාහරණයක් ලෙස ගෙන රට පුරා නවීන වාණිජ කාර්මාන්තකරණයක් සිදු කර ඉදිරි වසර 15-20 තුළ රට ශීඝ්ර සංවර්ධනයක් කරා ගෙන යාමේ වැඩපිළිවෙළ ආරම්භ කරන බව ජනාධිපති රනිල් වික්රමසිංහ මහතා පවසනවා.
එදා නොදියුණු ප්රදේශයක් වූ බියගම ප්රදේශය, වෙළෙඳ කලාපය ආරම්භ කිරීමත් සමඟ විශාල දියුණුවක් ලැබූ අතර ශ්රී ලංකාවම ආයෝජන කලාපයක් බවට පත්කර නව ආයෝජන අවස්ථා රැසක් ලොවට විවෘත කරන බවයි ජනාධිපතිවරයා සඳහන් කළේ.
ජනාධිපති රනිල් වික්රමසිංහ මහතා මේ බව ප්රකාශ කළේ මල්වාන, අල් මුබාරක් මධ්ය මහා විද්යාලයේ සියවස් සැමරුම් උත්සවයට අද (06) පස්වරුවේ එක් වෙමින්.
දැනටමත් කර්මාන්තපුර ඇති කිරීම සඳහා බිංගිරිය, හම්බන්තොට, මහනුවර, ත්රිකුණාමලය සහ උතුරු පළාතේ ද ප්රදේශ කිහිපයක් හඳුනාගෙන තිබෙන අතර එම කටයුතු කඩිනම් කරන බවත් ඒ සමඟ එම සියලු ප්රදේශ වාණිජ නගර ලෙස ගොඩනැගෙන බවත් ජනාධිපතිවරයා පෙන්වා දී තිබෙනවා.
එසේම තම තමන්ගේ දිස්ත්රික්ක සංවර්ධනය කිරීම වෙනුවෙන් ආයෝජන අවස්ථා ගෙන ඒමට ජනතා නියෝජිතයන්ගේ කැපවීම ද ජනාධිපති රනිල් වික්රමසිංහ මහතා අවධාරණය කළා.
ශ්රී ලංකාවට කර්මාන්තපුර සුදුසු නොවන බවට එදා ඇතැමුන් ප්රකාශ කළද අද බියගම ආයෝජන කලාපය දකුණු ආසියාවේ හොඳම වෙළෙඳ කලාපය බවට පත්ව ඇති බවයි ජනාධිපතිවරයා කියාසිටියේ.
රටේ සෑම පළාතකම බියගම සහ කටුනායක වැනි කර්මාන්තකරණයක් සිදු කළේ නම් අද රටක් ලෙස ආර්ථික පීඩාවකට ලක් නොවන බවත් ජනාධිපතිවරයා පෙන්වා දුන්නා.
නව ආයෝජන කලාප ඇති කරමින් රටේ ආර්ථිකය සවිමත් කිරීමට කටයුතු කරන අතරම අනාගත තරුණ පරපුරට රැකියා අවස්ථා විවර කරදීමට කටයුතු කරන බවද ජනාධිපතිවරයා සඳහන් කළා.
අද පස්වරුවේ මල්වාන අල් මුබාරක් මධ්ය මහා විද්යාලයට පැමිණි ජනාධිපති රනිල් වික්රමසිංහ මහතා සිසු දරුවන් විසින් මහත් හරසරින් පිළිගත් බවයි ජනාධිපති මාධ්ය අංශය කියාසිටියේ.
විද්යාලයට වසර 100ක් සපිරීමට සමගාමීව සමරු මුද්දරයක් නිකුත් කිරීම සහ විද්යාලයේ නව තෙමහල් ගොඩනැඟිල්ල විවෘත කිරීම ද ජනාධිපති රනිල් වික්රමසිංහ මහතා අතින් සිදු කෙරුණා
.
මල්වාන, අල් මුබාරක් මධ්ය මහා විද්යාලයට ප්රථමවරට ජනාධිපතිවරයෙක් පැමිණීම සනිටුහන් කරමින් විශේෂ අමුත්තන්ගේ පොතේ සමරු සටහනක් තැබූ ජනාධිපතිවරයා විද්යාලයේ සියවස් සමරු ස්මාරකය ද විවෘත කිරීමට එක්වුණා. විද්යාලයේ විශිෂ්ට දක්ෂතා දැක්වූ සිසුන්ට තිළිණ සහ සහතික පත් ප්රදානය කිරීම ද ජනාධිපති රනිල් වික්රමසිංහ මහතා අතින් සිදු කෙරුණා.
