වයස අවුරුදු 15යි මාස 05ක බාලවයස්කාර පාසල් සිසුවියක් මව්පිය භාරකාරත්වයෙන් පැහැර ගෙන යාමට අනුබල දුන් 19 හැවිරිදි තරුණයෙකු අත්අඩංගුවට ගෙන ඇති බව මාදම්පේ පොලිසිය පවසනවා.
මෙලෙස අත්අඩංගුවට ගෙන ඇත්තේ මාදම්පේ, ගලහිටියාව ප්‍රදේශයේ පදිංචි තරුණයෙක්.
මේ අතර පැහැර ගැනීම සඳහා යොදාගත් බව කියන කුඩා ප්‍රමාණයේ ලොරි රථයක් ද පොලිස් භාරයට ගෙන තිබෙනවා.
පැහැර ගැනීමට ලක් වූ දැරිය 10 වන වසරේ ඉගෙනුම ලබන අතර, ඇය ඉකුත් 18 වෙනිදා පෙරවරුවේ පාසලේ පැවැත්වෙන සම්මන්ත්‍රණයකට සහභාගි වීම සදහා යැයි පවසා නිවසින් පිටත්ව ගොස් තිබෙනවා.
නමුත් ඇය පාසලේ පැවති සම්මන්ත්‍රණයට සහභාගී නොමැති බවයි ඇයගේ මවට දැනගන්නට ලැබී ඇත්තේ.
දැරිය මාදම්පේ, පොතුවිල ප්‍රදේශයේ පදිංචි 18 හැවිරිදි තරුණයෙකු සමඟ ප්‍රේම සම්බන්ධතාවක් පවත්වා ගෙන ගොස් ඇති බවත්, එම තරුණයා ද මේ වන විට අතුරුදහන්ව ඇතැයි අතුරුදන් දැරියගේ මව පොලිසිය පැමිණිලි කරමින් පවසා තිබෙනවා.
මාදම්පේ පොලීසිය සිද්ධිය පිළිබඳව වැඩිදුර විමර්ශන කරනු ලබනවා.
