රට පත්ව ඇති මූල්‍ය අර්බුදයෙන් මුදා ගැනීමේ අරමුණෙන් රජය හඳුන්වා දුන් නව බදු ප්‍රතිපත්ති වෙනස් කළ නොහැකි ශිලා ලේඛන නොවන බව මුදල් රාජ්‍ය අමාත්‍ය ආචාර්ය රංජිත් සියඹලාපිටිය මහතා පවසනවා.
අමාත්‍යවරයා පෙන්වා දෙන්නේ බදු ගෙවන්නන්ගේ යෝජනා සහ විකල්ප අදහස් සමග නම්‍යශීලී වීමට රජය ඕනෑම මොහොතක සූදානම් බවයි.
බදු ගෙවන්නන්ගේ අදහස් ලබා ගැනීම සඳහා සංවිධානය කෙරෙන “දිරිය පවුර” දීප ව්‍යාප්ත සම්මන්ත්‍රණ මාලාව සමාරම්භ කරමින් අමාත්‍යවරයා අද (23) මේ බව ප්‍රකාශ කළා.
කොළඹ දිස්ත්‍රික්කයේ බදු ගෙවන්නන් වෙනුවෙන් පැවැති මෙම සම්මන්ත්‍රණය ඉදිරියේ දී දිවයිනේ සෑම ප්‍රදේශයක්ම ආවරණය කරමින් පැවැත්වීමට නියමිත යි.
“දළ දේශීය නිෂ්පාදිතයට සාපේක්ෂව ලෝකයේ අඩුම ආදායම් ලබන රටවල් අතට ශ්‍රී ලංකාවත් එක් වුණා. ණය ගෙවා ගත නොහැකි බව ලෝකයට කියන්න වුණා. මේ සියල්ල ඒ විදියට සිදු වෙද්දි අපේ රටේ පවුල් ලක්ෂ 58න් ලක්ෂ 34ක් ජීවත්වීම සඳහා රජයෙන් ආධාර ඉල්ලනවා. පාසල්වල දරුවන් ලක්ෂ 42ක් ඉගෙන ගන්නවා. තවත් ලක්ෂ දෙකක් විතර දරුවන් පිරිසක් විශ්වවිද්‍යාලවල ඉගෙන ගන්නවා. වාර්ෂිකව ලක්ෂ 57ක විතර ජනතාවක් රෝහල් නේවාසිකව ප්‍රතිකාර ලබනවා. රටේ ජනගහනය කෝටි දෙකක් වුණාට කෝටි හයක විතර ජනතාව රෝහල්වල බාහිර රෝගී අංශවලින් ප්‍රතිකාර ලබනවා. මේ එකක්වත් අපට නවත්වන්න බෑ. අපි මොකක් ද කරන්නෙ. ණය ගන්න හැකියාවක් නෑ.
අපට තියෙන හොඳම විකල්පය බදු ආදාම වැඩි කර ගැනීම. ඒ සඳහා තමයි මේ නව බදු ප්‍රතිපත්ති හදන්නෙ. අපි මේ සම්මන්ත්‍රණ මාලාව ආරම්භ කරන්නෙ මේ නව ප්‍රතිපත්ති ගැන බදු ගෙවන ජනතාව විදියට ඔය දක්වන ප්‍රතිචාරයන්, විකල්ප යෝජනා අදහස්වලට සවන් දෙන්නයි. මේ කිසි දෙයක් සෙල්ලිපි නොවෙයි. බදු ගෙවන ජනතාවගේ ඉල්ලීම, සාධාරණ යෝජනා මත නම්‍යශීලී වෙන්න රජය ඕනෑම මොහොතක සූදානම් ” යනුවෙන් අමාත්‍යවරයා සඳහන් කළා.
