සිය අවසන් මැතිවරණ ප්‍රචාරණ කටයුතු අතරතුර හිටපු අමාත්‍ය රිෂාඩ් බදියුදීන්ගේ ආධාරකරුවන් පිරිසක් සහ හිටපු රාජ්‍ය අමාත්‍ය කාදර් මස්තාන්ගේ ආධාරකරුවන් පිරිසක් අතර ගැටුමක් ඇතිව තිබෙනවා.
ඊයේ (11) රාත්‍රියේ වවුනියාව, පට්ටාන්ච්චිචූර් ප්‍රදේශයේ දී ඇති වූ මෙම ගැටුමෙන් පුද්ගලයින් දෙදෙනෙකු තුවාල ලබා ඇති බවයි වාර්තා වුණේ.
හිටපු රාජ්‍ය අමාත්‍ය කාදර් මස්තාන්ගේ අවසන් ප්‍රචාරණ රැළිය පට්ටාන්ච්චිචූර් ප්‍රදේශයේ පැවති අතර, හිටපු අමාත්‍ය රිෂාඩ් බදියුදීන්ගේ ප්‍රචාරණ රැස්වීමක්ද අදාළ ප්‍රදේශයේ පැවැත්වීමට නියමිතව තිබුණා.
එම රැස්වීම වෙනුවෙන් රිෂාඩ් බදියුදීන් සහ ඔහුගේ ආධාරකරුවන් ගමන් කරමින් සිටිය දී කාදර් මස්තාන්ගේ ආධාරකරුවන් රිෂාඩ් බදියුදීන් ගමන්ගත් වාහනයට සහ අනෙකුත් පරිවාර රථවලටපහර දී ඇති බවයි වාර්තා වුණේ.
අදාළ අවස්ථාවේ ආධාරකරුවන් දෙපාර්ශ්වය අතර ගැටුමක් හටගත් අතර, වවුනියාව පොලිසිය සහ නෙලුක්කුලම පොලිසිය මැදිහත්ව ගැටුම සමතයකට පත් කර තිබෙනවා.
මෙම ගැටුමට සම්බන්ධ පිරිස් අත්අඩංගුවට ගැනීමට නියමිත අතර, සිද්ධිය සම්බන්ධයෙන් වවුනියාව පොලිසිය හා නෙලුක්කුලම පොලිසිය වැඩිදුර පරීක්ෂණ පවත්වනවා.
