“ඩොනල්ඩ් ට්රම්ප්” යන අන්වර්ථ නාමයෙන් හඳුන්වනු ලැබූ බංග්ලාදේශයේ ඇල්බිනෝ වර්ගයේ මී හරකා මෙවර හජ් උත්සවයේ බිලි පූජාවෙන් නිදහස් කිරීමට පියවර ගෙන ඇති බව වාර්තා වනවා.
මෙම සත්වයා පිළිබදව සමාජ මාධ්යයේ දැඩි ලෙස කතා බහට ලක්වීමත් සමඟ, එරට රජයේ අවසන් මොහොතේ මැදිහත්වීමකින් පසු සත්වයා ඊද් අල්-අදා පූජාවෙන් බේරී ඇති බවයි ස්වදේශ කටයුතු අමාත්යාංශ නිලධාරියෙක් විදෙස් මාධ්ය වෙත පවසා ඇත්තේ.
ඇල්බිනෝ වර්ගයේ මෙම මී හරකාගේ හිසේ ඇති කෙස් ඇමරිකානු ජනාධිපති ඩොනල්ඩ් ට්රම්ප්ගේ කොන්ඩා විලාසිතාවට සමානකමක් දැක්වීම හේතුවෙන් සත්වයාගේ හිමිකරු විසින් මෙම සත්වයාට “ඩොනල්ඩ් ට්රම්ප්” ලෙස නම් තබා තිබෙනවා.
විදෙස් මාධ්ය වාර්තාවලට අනුව, මෙම සත්වයාගේ දර්ශන සහ ඡායාරූප අන්තර්ජාලය ඔස්සේ සංසරණය වෙමින් බංග්ලාදේශය පුරා දැඩි අවධානයක් දිනා ගැනීමත් සමඟ කිලෝග්රෑම් 700ක් පමණ බරැති මෙම සත්වයා දැකබලා ගැනීම සඳහා විවිධ ප්රදේශවලින් පැමිණි විශාල පිරිසක් සත්වයා රඳවා සිටි ගොවිපළ වෙත පැමිණෙන්නට වුණා.
සත්වයාගේ හිමිකරු විසින් හජ් උත්සවය වෙනුවන් බිලි දීමට එම මී හරකා සූදානම් කර තිබූ නමුත්, රජය විසින් එම සත්වයාව ඉන් නිදහස් කරගෙන ඩකා අගනුවර පිහිටි ජාතික සත්වෝද්යානය වෙත රැගෙන යෑමට කටයුතු කර ඇති බවයි වාර්තා වන්නේ.
