සිය පෙම්වතියට පිහියකින් ඇන ඝාතනය කළ බව පවසා ඇයගේ පෙම්වතා යැයි පැවසෙන පුද්ගලයෙකු වෙන්නප්පුව පොලිසියට පැමිණ භාර වී තිබෙනවා.
දසත ප්‍රාදේශීය වාර්තාකරු පැවසුවේ අද (18) පස්වරු 05.30ට පමණ සැකකරු ව පොලිස් ස්ථානයේ දී අත්අඩංගුවට ගෙන ඇති බවයි.
වෙන්නප්පුව පොලිස් වසමේ වයික්කාල පාසල ආසන්නයේ නිවසක දී මෙම ඝාතනය සිදු වී තිබෙනවා.
මෙලෙස මියගොස් ඇත්තේ වෙන්නප්පුව – වයික්කාල, පාසල අසල පදිංචි ව සිටි විමල්කා තුෂාරි නම් වූ 19 හැවිරිදි අයෙක්.
මියගොස් ඇති තරුණිය වසර එකහමාරක පමණ කාලයක් මාරවිල – වීරහේන ප්‍රදේශයේ පදිංචි 21 හැවිරිදි සැකකරු සමග ප්‍රේම සම්බන්ධතාවක් පවත්වා ගෙන ගොස් තිබෙනවා.
”මෙම සම්බන්ධතාව නවත්වා දමමු” යැයි පෙම්වතිය විසින් පෙම්වතාට යෝජනා කර තිබෙන බවයි පැවසෙන්නේ.
එම යෝජනාව සම්බන්ධයෙන් දෙදෙනා අතර පෙම්වතියගේ නිවසේ දී ඇති වූ බහින්බස්වීමකින් අනතුරුව පිහි ඇණුම සිදු වී ඇති බව පොලීසිය පවසනවා.
තුවාල ලබා සිටි තරුණිය ප්‍රතිකාර සඳහා මීගමුව මහා රෝහලට රැගෙන යමින් සිටින අතරතුර මියගොස් තිබෙනවා.
