පිහි ඇණුමකින් පුද්ගලයෙක් ජීවිතක්ෂයට – ඝාතකයා සහ තවත් අයෙකු තුවාල ලබා රෝහලේ

දෙදෙනෙක් අතර ඇති වූ බහින් බස්වීමක් දුර දිග යාමෙන් අනතුරුව සිදුකළ පිහි ඇණුමකින් පුද්ගලයෙකු ජීවිතක්ෂයට පත්ව දෙදෙනෙක් තුවාල ලබා තිබෙනවා.

බෝයවලාන පොලිසිය සදහන් කළේ මෙලෙස ඝාතනයට ලක්ව ඇත්තේ මහරච්චිමුල්ල, දුන්දෙණිය ජනපදයේ පදිංචිව සිටි ලියනවඩුගේ සුමේධ ක්‍රිශාන් ලියනගේ නැමැති 42 හැවිරිදි පුද්ගලයෙක්.

ඊයේ (14) පස්වරුවේ  බෝයවලාව, හෙන්ඩුවාව ප්‍රදේශයේ දී මෙම අපරාධය සිදුව ඇති අතර, මින් තුවාල ලැබූවන් අතර ඝාතනයට ලක් වූ පුද්ගලයාගේ සහෝදරයෙකු සහ ඝාතනය සිදුකළ තැනැත්තා ද වන බවයි පොලිසිය පැවසුවේ.

අපරාධය සිදුකළ සැකකරු ගංජා මිලිග්‍රෑම් 750ක් සන්තකයේ තබා ගැනීමේ වරදට ඉකුත් 09 වැනිදා බෝයවලාන පොලීසිය විසින් අත්අඩංගුවට ගෙන තිබුණා.

ඔහුව එලෙස අත්අඩංගුවට ගැනීමට ඔත්තුව ලබාදී ඇත්තේ ඝාතනය වූ පුද්ගලයා බවටයි සැකකරු සිතාගෙන ඇත්තේ.

ඊයේ (14) පස්වරුවේ අදාළ පුද්ගලයා තම සහෝදරයෙකු ද සමඟ ගමන් කරමින් සිටිය දී අතර මඟදී සැකකරු හමු වී තිබෙනවා.

එහිදී දෙදෙනා අතර ඇති වූ බහින් බස්වීමකින් අනතුරුව සැකකරු විසින් මෙම පිහි ඇණුම සිදුකර ඇති බවයි වාර්තා වුණේ.

පිහි ඇණුමෙන් තුවාල ලැබූවන්ගෙන් එක් අයෙක් මේ වන විට දඹදෙණිය රෝහලේ ප්‍රතිකාර ලබමින් සිටින බවයි අප වාර්තාකරු සඳහන් කළේ.

තුවාල ලැබූ ඝාතනය සිදුකළ සැකකරු අලව්ව රෝහලේ හදිසි ප්‍රතිකාර ඒකකයට ඇතුළත් කර ඇති බව පොලීසිය පැවසුවා.

බෝයවලාන පොලීසිය මෙම සිද්ධිය සම්බන්ධයෙන් වැඩිදුර විමර්ශණ කටයුතු සිදුකරනු ලබනවා.