පැවිදි දිවියට එළඹීම සඳහා රුපියල් කෝටි 200ක ධනයක් පරිත්‍යාග කළ ව්‍යාපාරික යුවළක් පිළිබද පුවතක් ඉන්දියාවෙන් වාර්තා වනවා.
ගුජරාටයේ ධනවත් ජෛන ව්‍යාපාරික යුවළක් මෙලෙස රුපියල් කෝටි 200කට ආසන්න මුදලක් බෙදා දී පැවිදි බව ලබාගෙන ආධ්‍යාත්මික දිවියකට එළඹීමට තීරණය කර ඇති බවයි වාර්තා වන්නේ.
මෙම ව්‍යාපාරිකයා සහ ඔහුගේ බිරිඳ පසුගිය පෙබරවාරි මාසයේ පැවති උත්සවයකදී ඔවුන්ගේ සියලු ධනය පරිත්‍යාග කළ අතර, මෙම මස අගදී පැවිදි දිවියට එළඹීමට නියමිත බව සඳහන්.
ඉදිකිරීම් ක්ෂේත්‍රයේ ව්‍යාපාරයක නිරතව සිටි මෙම ව්‍යාපාරිකයාගේ 19 හැවිරිදි දියණිය සහ 16 හැවිරිදි පුත්‍රයා ද 2022 වසරේ දී පැවිදි දිවියට පත්ව ඇති බවයි වාර්තා වන්නේ.
මව සහ පියා ද එම දරුවන් දෙදෙනාගේ අඩිපාරේ ගමන් කරමින් මෙලෙස තමන්ගේ ද්‍රව්‍යමය බැඳීම් අත්හැර තපස් මාර්ගයට එළඹීමට තීරණය කර ඇති බවයි වාර්තා වන්නේ.
එළෙඹෙන අප්‍රේල් 22 වන දින ප්‍රතිඥාව ලබා ගැනීමෙන් පසු, මෙම යුවළට සියලු පවුල් බැඳීම් අත්හැරිය යුතු අතර, කිසිදු ද්‍රව්‍යමය වස්තුවක් තබා ගැනීමට අවස්ථාව සැලසෙන්නේ නැහැ.
ඉන්පසු ඔවුන් ඉන්දියාව පුරා පාවහන් නොමැතිව ගමන් කර දානයෙන් පමණක් ජීවත් වනු ඇති බවයි ඉන්දීය මාධ්‍ය තොරතුරු වාර්තා කර තිබුණේ.
ජෛන ආගමේ ‘දික්ෂා’ ගැනීම සැලකිය යුතු කැපවීමක් වන අතර පුද්ගලයා භෞතික සැප සම්පත් නොමැතිව, දානයෙන් පමණක් දිවි ගෙවමින් සහ පාවහන් නොමැතිව රට පුරා ඇවිදිමින් ජීවත්වන බව සඳහන්.
