පන්දු වාර විස්සයි විස්ස ලෝක කුසලානයේ පාකිස්ථානය සහ ඉන්දියාව අතර පැවති තරගයේ දී පාකිස්ථානයේ ජයග්‍රහණය වර්ණනා කළ ඉන්දීය ජාතිකයින් පිරිසක් අත්අඩංගුවට ගෙන ඇති බවට විදෙස් මාධ්‍ය වාර්තා කර තිබෙනවා.
මේ අතර වට්ස්ඇප් ඔස්සේ අදහස් පළ කළ නෆීසා අටාරි නම් වන ඉන්දියාවේ උදයිපූර් නගරයේ ගුරුවරියක් ද වන බවයි විදෙස් මාධ්‍ය සඳහන් කරන්නේ.
ඇයව රැකියාවෙන් නෙරපා හැර ඇති අතර, ජාතික ඒකාබද්ධතාවයට අගතියක් වන ප්‍රකාශ අපරාධයක් ලෙස සලකන ඉන්දීය දණ්ඩ නීති සංග්‍රහයේ වගන්තියක් යටතේ අත්අඩංගුවට ගැනීම සිදු කර තිබුණා.
මෙම අත්අඩංගුවට ගැනීම් ආණ්ඩු කරන පක්ෂයේ න්‍යාය පත්‍රයේ නවතම ආයුධය බවට නිරීක්ෂකයින් තර්ක කරන අතර, එම චෝදනා රජය විසින් තරයේ ප්‍රතික්ෂේප කරනු ලැබ තිබෙනවා.
දැඩි මතධාරී හින්දු ජාතිකවාදී සංවිධානයක් වන බජ්රන්ග් දාල් හි සාමාජිකයෙකු වන රාජේන්ද්‍ර පර්මාර් විසින් පැමිණිල්ල ඉදිරිපත් කර ඇති අතර නෆීසා අට්ටාරි ගේ නීතීඥ රාජේෂ් සිංවි සඳහන් කරන්නේ පොලිසිය සිදු කර ඇති දේ සම්පූර්ණයෙන්ම වැරදි බවයි.
