පළාත් පාලන ආයතන විශේෂ විධිවිධාන පනත් කෙටුම්පත දෙවැනි වර හා තෙවැනි වර කියැවීම විශේෂ බහුතරයකින් සම්මත වුණා.
ඒ පාර්ලිමේන්තුවේ කතානායකවරයාගේ ප්‍රධානත්වයෙන් අද (18) පස්වරුවේ පැවැත්වූ දෙවැනි වර කියැවීමේ අවස්ථාවෙන් පසුව එළඹුණු ඡන්ද විමසීමේදියි.
දෙවැනි වර කියවීමේ දී ඊට පක්ෂ ව ඡන්ද 187ක් ලැබුණු අතර විපක්ෂ ව කිසිදු ඡන්දයක් හිමිවුණේ නැහැ.
එමෙන්ම මෙම පනතට ඡන්දය ලබා නොදුන් මන්ත්‍රීවරයෙකු ද පාර්ලිමේන්තුවේ නොසිටීම ද විශේෂත්වයක්.
කෙසේවෙතත් මෙම පනත් කෙටුම්පත තුන්වැනි වර කියැවීමේ ඡන්ද විමසීමක් ද සිදු කෙරුණු අතර එහිදී මෙම පනත් කෙටුම්පතට පක්ෂ ව ඡන්ද 158ක් හිමිවුණා.
විපක්ෂ ව ඡන්ද හිමි නොවූ අතර ඡන්දය දීමෙන් කිසිදු මන්ත්‍රීවරයෙකු වැළකී නොසිටි බවයි කතානායකවරයා ප්‍රකාශ කළේ.
එම ප්‍රතිඵල අනුව පළාත් පාලන ආයතන විශේෂ විධිවිධාන පනත් කෙටුම්පත තෙවැනි වර කියවා, සංශෝධන රහිත ව විශේෂ බහුතරයකින් සම්මත වුණා.
පළාත් පාලන ආයතන විශේෂ විධිවිධාන පනත් කෙටුම්පතේ ඇතැම් වගන්ති ව්‍යවස්ථාවට අනනුකූල බැවින් විශේෂ බහුතරයකින් සම්මත කළ යුතු බව කතානායකවරයා පසුගියදා (14) පාර්ලිමේන්තුවට දැනුම්දෙනු ලැබුවා.
පැවැත්වීමට නියමිත පළාත් පාලන ආයතන ඡන්ද විමසීම් සංශෝධන පනත් කෙටුම්පත සම්බන්ධයෙන් වන පෙත්සම් සලකා බැලීමෙන් අනතුරුව ශ්‍රේෂ්ඨාධිකරණය දුන් තීන්දුව කතානායකවරයා විසින් ප්‍රකාශයට පත් කරමින් මේ බව සඳහන් කළා.
