මිනිස් පරිභෝජනයට සුදුසු සහල් සත්ව ආහාර සඳහා යොදා ගනිමින් තිබූ ආණමඩුව ආඬිගම කම්මන්දළුව ප්‍රදේශයේ සත්ව ආහාර නිෂ්පාදනය කරනු ලබන කර්මාන්ත ශාලාවකට මුද්‍රා තබා තිබෙනවා.
පාරිභෝගික අධිකාරියේ විශේෂ විමර්ශන හා වැටලීම් ඒකකය මෙලස මුද්‍රා තබා ඇත්තේ ප්‍රදේශයේ සත්ව ආහාර නිෂ්පාදනය කරනු ලබන මහා පරිමාණ කර්මාන්ත ශාලාවකටයි.
මිනිස් පරිභෝජනය සඳහා සුදුසු සහල් මිනිස් පරිභෝජනයට නුසුදුසු සහල් බව හඟවමින් නීති විරෝධී ලෙස සත්ව ආහාර සඳහා මෙම කර්මාන්ත ශාලාව විසින් දිර්ඝ කාලයක සිට යොදා ගෙන තිබු බවට හෙළිවී තිබෙනවා.
අදාළ කර්මාන්ත ශාලාව පරික්ෂා කිරීමේදී එම කර්මාන්ත ශාලාවේ ගබඩා කර තිබු කිලෝ 27000කට ආසන්න සහල් තොගයක් උරවල අසුරා තිබියදී සොයා ගත් බවයි විශේෂ වැටලීම් ඒකකය සඳහන් කළේ.
පාරිභෝගික කටයුතු පිළිබඳ අධිකාරියේ නියෝග පිළිනොගනමින් රට තුළ පවතින තත්වය පවා සැලකිල්ලට නොගෙන මෙලෙස ආහාරයට සුදුසු සහල් සත්ව ආහාර සඳහා යොදා ගැනීම සිදු කර තිබූ බවයි විශේෂ විමර්ශන ඒකකය පවසන්නේ.
විමර්ශන නිලධාරීන් අදාළ ස්ථානයට යන විටත් සහල් තොග සත්ව ආහාර සඳහා යොදා ගනිමින් තිබු බව ද සඳහන්.
ඒ අනුව අදාළ කර්මාන්ත ශාලාව විශේෂ පරීක්ෂාවකට ලක් කර එහි විශාල උර 600ක ගබඩා කර තිබු පරිභෝජනයට සුදුසු සහල් කිලෝ 27000ක් මෙලෙස සොයා ගෙන තිබෙනවා.
අදාළ සහල් තොගය සහිත කර්මාන්ත ශාලව වසා දමා සියලු දොරටු මුද්‍රා තබා ඒ පිළිබඳ හෙට (07) ආණමඩුව අධිකරණයට කරුණු ඉදිරිපත් කරන තුරු කර්මාන්ත ශාලාව මුද්‍රා තැබිමටයි පාරිභෝගික අධිකාරියේ විශේෂ විමර්ශන හා වැටලීම් ඒකකය කටයුතු කර ඇත්තේ.
