නේපාලයේ හිම කඳු කඩා වැටීමකින් කඳු නගින්නන් හත්දෙනෙකු මියගොස් ඇති බව වාර්තා වනවා.
විදෙස් කඳු නගින්නන් පස්දෙනෙක් සහ නේපාල මාර්ගෝපදේශකයින් දෙදෙනෙකු මෙලෙස ජීවිතක්ෂයට පත්ව ඇති බවයි විදෙස් මාධ්‍ය වාර්තා කළේ.
මියගිය විදේශීය කඳු නගින්නන්ගේ අනන්‍යතාවයන් තවමත් තහවුරු කර නොමැති බවයි නේපාල බලධාරීන් පැවසුවේ.
15 දෙනෙකුගෙන් යුත් කණ්ඩායමක් යාලුන්ග් රී කඳු මුදුන තරණය කිරීමට යන අතරතුරමෙම ඛේදවාචකයට මුහුණ දී ඇති බවයි තොරතුරු වාර්තා වන්නේ.
මේ අතර සන්නද්ධ පොලිස් බලකායේ ප්‍රකාශක ශයිලේන්ද්‍ර තාපා පැවසුවේ මීටර් 4,900 (අඩි 16,070) ක උසකින් පිහිටි මූලික කඳවුරේ තවත් පස්දෙනෙකු තුවාල ලබා ඇති බවයි.
ගලවා ගැනීමේ හෙලිකොප්ටරයක් එම ස්ථානයට ළඟා වීමට උත්සාහ කළ නමුත් අයහපත් කාලගුණය හේතුවෙන් එය ආපසු හැරවීමට සිදුව ඇති බවයි වාර්තා වුණේ.
කෙසේ වෙතත් අද (04) දිනයේ ගලවා ගැනීමේ හෙලිකොප්ටරයක් යොදවා එම මෙහෙයුම් සිදුකරන බව බලධාරීන් පවසනවා.
පසුගිය සතියේ සිට නේපාලයේ කාලගුණය අයහපත් අතට හැරෙමින් පවතින අතර කඳුකරයේ හිම කුණාටු වාර්තාවන බවයි විදෙස් වාර්තා සඳහන් කළේ.
