ජනතාවගේ ආහාර සුරක්ෂිතතාව ඇති කිරීම සහ ගුණාත්මක හා ප්රමාණවත් ආහාරවේලක් සාධාරණ මිලට ලබා ගැනීමේ අවස්ථාව සලසා දීම සඳහා දිවයින පුරා නව ආපණශාලා ස්ථාපිත කිරීමේ වැඩසටහනක් ක්රියාත්මක කිරිමට රජය සැලසුම් කර තිබෙනවා.
ජනාධිපති මාධ්ය අංශය නිවේදනය කළේ, ජාතික ආහාර ප්රවර්ධන මණ්ඩලය, සෞඛ්ය අමාත්යාංශය හා කෘෂිකර්ම අමාත්යාංශය එක්ව දැනට ආපණශාලා පවත්වාගෙන යන ව්යාපාරිකයන්ගේ ද සහාය ලබා ගනිමින් මෙම වැඩපිළිවෙළ ක්රියාත්මක කිරීමට නියමිත අතර එහි පළමු ආදර්ශ ආපණ ශාලාව අප්රේල් 01 වන දා නාරාහේන්පිට දී විවෘත කිරීමට නියමිත බවයි.
මේ අතර දැනට පවත්වාගෙන යන ආපණ ශාලාවල ප්රමිතිය ඉහළ නැංවීමේ වැඩසටහනක් මෙහි දෙවන අදියර ලෙස ක්රියාත්මක කිරීමට නියමිත ව තිබෙනවා.
මේ පිළිබඳ මූලික සාකච්ඡාවක් ජාතික ආහාර ප්රවර්ධන මණ්ඩලය, සෞඛ්ය අමාත්යාංශය හා කෘෂිකර්ම අමාත්යාංශයේ නිලධාරීන්ගේ සහභාගිත්වයෙන් ඊයේ (27) ජනාධිපති කාර්යාල පරිශ්රයේ දී පැවැත්වුණා.
ජනතාවට සෞඛ්යාරක්ෂිත ආහාර වේලක් ලබා ගැනීමට ඇති අයිතිය තහවුරු කිරීම පිළිබඳව මෙහිදී දීර්ඝ ලෙස සාකච්ඡා කෙරුණු අතර පාරිභෝගික ජනතාවට නිසි සෞඛ්ය ප්රමිතීන්ට අනුකූල ආහාර ලබා ගැනීම සඳහා අවශ්ය පරිසරය නිර්මාණය කිරීම, පාරිභෝගික විශ්වාසය වර්ධනය කිරීම සඳහා ගත හැකි ක්රියාමාර්ග මෙන්ම ඒ සඳහා රාජ්ය සහ පෞද්ගලික අංශවල දායකත්වය ලබා ගැනීම පිළිබඳවද සාකච්ඡා කෙරුණා.
එමෙන්ම ආහාර ප්රමිතිකරණය සහ ගුණාත්මකභාවය සඳහා මෙරට තිබෙන ප්රතිපත්ති සහ සැලසුම් ප්රායෝගික ලෙස යෙදවීම මෙන්ම පාරිභෝගික ජනතාවට පෝෂ්යදායී සහ සෞඛ්යාරක්ෂිත ආහාර වේලක් සැපයීම පිළිබඳ වෙළෙඳ ප්රජාව තුළ ආකල්පමය පරිවර්තනයක් ඇති කිරීම සඳහා “ක්ලීන් ශ්රී ලංකා” වැඩසටහන හරහා ගත හැකි ක්රියාමාර්ග පිළිබඳව ද මෙහිදී විමසා බැලුණු බවයි වාර්තාවන්නේ.
ජනාධිපති ජ්යෙෂ්ඨ අතිරේක ලේකම් කපිල බණ්ඩාර, ජනාධිපති අතිරේක ලේකම් එස්.පී.සී. සුගීෂ්වර යන මහත්වරුද, ජාතික ආහාර ප්රවර්ධන මණ්ඩලය, සෞඛ්ය අමාත්යාංශය හා කෘෂිකර්ම අමාත්යාංශය නියෝජනය කරමින් ජ්යෙෂ්ඨ නිලධාරීන් පිරිසක් ද මෙම අවස්ථාවට එක්ව සිටියා.
